სირიის სამხედრო-ავიაციის ძალებმა ქალაქ ალეპოსა და მის მიმდებარე ტერიტორიებზე, რომლებსაც ოპოზიციური ძალები აკონტროლებენ, იერიში მიიტანეს.

ამის შესახებ სააგენტო ”როიტერს” ქვეყნის შეიარაღებული ძალების წყარომ განუცხადა.

იმ რაიონებს შორის, რომელთა მიმართაც ავიადარტყმები განხორციელდა, წყარო ალეპოსთან მდებარე ხან-თუმანის რაიონს ასახელებს. ”განადგურდა რამდენიმე ბრონირებული და სხვა ტიპის  მანქანა, ზოგიერთი მათგანი ტყვიამფრქვევებით იყო აღჭურვილი”, - ციტირებს ”როიტერი” სირიის შეიარაღებული ძალების წყაროს.
ალეპოზე იერიშების პარალელურად მსოფლიო ჯანდაცვის ორგანიზაცია ქალაქში დარჩენილ მოსახლეობას მოუწოდებს უსაფრთხო კორიდორით გამოვიდნენ, რათა მათ საჭირო სამედიცინო დახმარება აღმოუჩინონ. დასახლებულ ტერიტორიაზე ავიადარტყმები ზავის გაუქმების შემდეგ ყოველდღიურად გრძელდება.

ამჟამად მეამბოხეების მიერ კონტროლირებად აღმოსავლეთ ნაწილში 250 ათასზე მეტი მშვიდობიანი მოქალაქე იმყოფება.