მოსკოვი დონბასში 2014 წელს სამგზავრო თვითმფრინავის ჩამოგდებასთან დაკავშირებით საერთაშორისო ექსპერტთა დასკვნას არ ეთანხმება
რუსულ საზენიტო-სარაკეტო კომპლექსებს უკრაინის საზღვარი არასდროს გადაუკვეთავს. ასე აფასებს რუსეთის თავდაცვის სამინისტრო საერთაშორისო ექსპერტთა ჯგუფის მიერ გამოქვეყნებულ დასკვნას, რომლის მიხედვითაც უკრაინაში 2014 წელს სამგზავრო თვითმფრინავი რუსული ბუკის სისტემით ჩამოაგდეს, რაკეტის გასროლა კი პრორუს სეპარატისტთა მიერ კონტროლირებადი რაიონიდან განხორციელდა. დასკვნის თანახმად, აღმოსავლეთ უკრაინაში საზენიტო-სარაკეტო სისტემები რუსეთის ტერიტორიიდან შეიტანეს. მალაიზიის კუთვნილი ბოინგ 777 დონბასში 2014 წლის 17 ივლისს ჩამოაგდეს, რასაც 298 ადამიანი ემსხვერპლა.
