დღეს სასტუმრო ,,რედისონში’’ განათლების საერთაშორისო ცენტრისა და სოციალური მომსახურების სააგენტოს ორგანიზებით  „განათლების საერთაშორისო ცენტრის სტიპენდიანტთა დასაქმების ფორუმი 2016“  გაიმართა. ფორუმი განათლებისა და მეცნიერების მინისტრმა ალექსანდრე ჯეჯელავამ გახსნა.  

ფორუმში როგორც სახელმწიფო, ასევე კერძო კომპანიების  40-მდე დამსაქმებელმა, მათ შორის საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანიამ მიიღო მონაწილეობა.

კომპანიის დირექტორის მოადგილემ ანა ნატროშვილმა ის სტიპენდიანტები გაიცნო,    რომლებმაც საზღვარგარეთ, უმაღლეს სასწავლებლებში სამაგისტრო და სადოქტორო ხარისხი მიიღეს.

გაერთიანებული წყალმომარაგების კომპანიის წარმომადგენლებმა სტიპენდიანტებს  მიაწოდეს ინფორმაცია ამ ეტაპზე არსებული და სამომავლო ვაკანსიების  შესახებ, ასევე ამომწურავად უპასუხეს მათთვის საინტერესო კითხვებს.

კურსდამთავრებულებს საშუალება მიეცათ გასცნობოდნენ სამინისტროების, სსიპ-ების, შპს-ების და ქართულ ბაზარზე მოქმედი წამყვანი კომპანიების  წარმომადგენლებსა და  მათ საქმიანობას.