ჩვენი მონაცემებით, მომავალი პარლამენტი იქნება მრავალპარტიული, - განაცხადა „რესპუბლიკური პარტიის“ ლიდერმა დავით უსუფაშვილმა. მისი მტკიცებით, მომავალი პარლამენტის მრავალპარტიულობის თაობაზე მისი პროგნოზი გამართლდება.

„ჩვენ უკვე გავიარეთ კენჭისყრის ორი მესამედი. დარჩენილია კიდევ ერთი მესამედი და შემიძლია თამამად განვაცხადო, რომ ჩვენ შევძელით არჩევნების კარგად ორგანიზება და რაც ყველაზე მთავარია, ამომრჩეველს აქვს თავისუფლება, თავისუფლად გააკეთოს არჩევანი, მისცეს ხმა. გვაქვს ინფორმაცია სხვადასხვა ხარვეზებთან დაკავშირებით, მაგრამ ეს მხოლოდ ხარვეზებია. ვინაიდან სერიოზულ დარღვევებზე არ და ვერ ვსაუბრობთ. ჩვენი დამკვირვებლები აკვირდებიან უბნებს. ბოლო საათები არის ძალიან მნიშვნელოვანი და მინდა მივმართო ამომრჩევლებს, ნუ დარჩებით სახლში. ამომრჩეველთა აქტივობა არის მაღალი, მაგრამ არა იმდენად მაღალი, რომ საქართველოს პარლამენტი ადეკვატურად ასახავდეს მოსახლეობის განწყობებს”, - განაცხადა დავით უსუფაშვილი.

მისი შეფასებით, საარჩევნო ადმინისტრაციები უმკლავდებიან თავის საქმეს. ,,მაგრამ მინდა მოვუწოდო ბოლო საათებში კიდევ უფრო ყურადღებით იყვნენ. მივეხმაროთ ერთმანეთს, რომ ძალიან კარგად ჩატარდეს არჩევნები. ეს ჩვენი სახელმწიფო ფუნქციაა. მზადდება ეგზიტპოლები. ჩვენ არ ვაპირებთ არც ვიგლოვოთ და არც ვიზეიმოთ ეგზიტპოლების შედეგები. ჩვენ დაველოდებით ცესკო-ს შედეგებს და ამის შემდეგ ჩამოვყალიბდებით იმაზე, რა შედეგი გვაქვს. ამისკენ მოვუწოდებ სხვა პარტიებსაც”, - განაცხადა დავით უსუფაშვილმა.