მაჟორიტარული არჩევნების მეორე ტურის გამართვის ალბათობაზე საუბრობენ როგორც მმართველ პოლიტიკურ გუნდში, ასევე ოპოზიციაში. იმ შემთხვევაში, თუკი მართლაც დადგება მეორე ტურის საჭიროება, მისი გამართვის  უკიდურესი ვადა 2 ნოემბერი იქნება.

კერძოდ, ”საარჩევნო კოდექსის” თანახმად, , პარლამენტის მაჟორიტარული არჩევნების მეორე ტური უნდა გაიმართოს არჩევნების დღიდან არაუგვიანეს 25-ე დღისა, რაც იმას ნიშნავს, რომ მეორე ტურების გამართვის უკიდურესი ვადა 2 ნოემბერია. იმ შემთხვევაში, თუკი არჩევნების პირველ ტურში საჩივრები არ იქნება, ან თუ პირველი ინსტანციის სასამართლოს გადაწყვეტილება მეორე ინსტანციაში არ გასაჩივრდება, მაშინ შესაძლებელია მაჟორიტარული არჩევნების მეორე ტური დაინიშნოს არა 25-ე დღეს, არამედ უფრო ადრე. ანალოგიურად, მეორე ტურის შედეგების გასაჩივრებაზეა დამოკიდებული არჩევნების საბოლოო შედეგების გამოქვეყნება.

რაც შეეხება პარლამენტის სხდომის დანიშვნას, ეს დამოკიდებულია არჩევნების საბოლოო შედეგების გამოცხადებაზე.

კერძოდ, კონსტიტუციის თანახმად ახალარჩეული პარლამენტის პირველი სხდომა არჩევნებიდან 20 დღის განმავლობაში უნდა გაიმართოს. 
პარლამენტის რეგლამენტში ნათქვამია, რომ ახალარჩეული პარლამენტის პირველი სხდომა იმართება ცენტრალური საარჩევნო კომისიის მიერ პარლამენტის არჩევნების საბოლოო შედეგების შემაჯამებელი ოქმის გამოქვეყნების შემდეგ, პარლამენტის არჩევნების დღიდან 20 დღის განმავლობაში, თუ არჩევნების მეორე ტური არ დაინიშნა, ხოლო თუ არჩევნების მეორე ტური დაინიშნა − მეორე ტურის კენჭისყრის დღიდან 20 დღის განმავლობაში. 
პარლამენტი მუშაობას შეუდგება, თუ ცენტრალური საარჩევნო კომისია არჩეულად გამოაცხადებს პარლამენტის სრული შემადგენლობის არანაკლებ ორ მესამედს.