მიმდინარე წლის 20 ოქტომბერს, ევროკავშირის საჯარო ფინანსების პოლიტიკისა და მართვის რეფორმების პროექტის მხარდაჭერით, ფინანსთა სამინისტროს აკადემიაში, სახელმწიფო ხაზინის თანამშრომლებისთვის დაიწყო ორკვირიანი ტრენინგი, რომლის მიზანია სახელმწიფო ხაზინის მოხელეთა მომზადება საჯარო სექტორის ბუღალტრული აღრიცხვის საერთაშორისო სტანდარტებში (IPSAS).  

ტრენინგი გახსნეს ფინანსთა მინისტრის მოადგილემ, სახაზინო სამსახურის უფროსმა, ცოტნე ყავლაშვილმა, ევროკავშრის საჯარო ფინანსების პოლიტიკისა და მართვის პროექტის მენეჯერმა, ირაკლი ხმალაძემ და პროექტის განმახორციელებელი ჯგუფის ხელმძღვანელმა არნოლდ ჰოიტინკმა.

ბუღალტრული აღრიცხვის საერთაშორისო სტანდარტებთან მიახლოებისა და გაანალიზებისთვის მნიშნელოვანია ადგილობრივი კადრების კვალიფიკაციის ამაღლება. კურსის დასრულების შემდეგ, სახელმწიფო ხაზინა საბოლოო სახით ჩამოაყალიბებს ფინანსური აღრიცხვისა და ანგარიშგების ინსტრუქციას, რომელშიც გათვალისწინებული იქნება IPSAS-ის ის სტანდარტები, რომლებიც აღწერს ბიუჯეტის სპეციფიკურ ოპერაციებს. სწავლება მნიშვნელოვანია იმ კუთხითაც, რომ სახელმწიფო ხაზინის სერტიფიცირებული თანამშრომლები, შემდგომ საკუთარ ცოდნასა და გამოცდილებას უზიარებენ საბიუჯეტო ორგანიზაციების ბუღალტრებს. 

სპეციალურად ტრენინგისთვის ევროკავშირის სახელმწიფო ფინანსების მართვის პროგრამის ფარგლებში, ლუის ბერგერის გუნდის ხელშეწყობით, მოწვეული იქნა IPSAS-ის გამოცდილი ექსპერტი ჯორჯ ბრიტანი.