ევროსაბჭოში საქართველოს საპარლამენტო დელეგაციის წარმომადგენელი ეკა ბესელია კიდევ ერთხელ განმარტავს თუ რატომ არ მიიღო ქართულმა დელეგაციამ მონაწილეობა ასამბლეის მიერ უკრაინის შესახებ შემუშავებულ რეზოლუციაში. მისი შეფასებით საკითხის ირგვლივ ატეხილი აჟიოტაჟი სრული დემაგოგიაა.

,,არაერთხელ განვმარტეთ და ვფიქრობ, რომ გასაგებად ითქვა, მაგრამ თუკი ვინმეს დამატებითი სიცხადე სჭირდება, გეტყვით, რომ ეს არ იყო რეზოლუცია საქართველოს შესახებ. ეს იყო ტექსტი უკრაინასთან დაკავშირებით. კომიტეტის სხდომაზე, რომელსაც მე პირადად ვესწრებოდი, ყველა შესწორებას მხარი დავუჭირე. მხარი მთლიან რეზოლუციასაც დავუჭირე. სესიაზე მე კენჭისყრაში მონაწილეობას არ ვიღებ. უკრაინელი კოლეგების მხრიდან არც დელეგაციასთან ყოფილა რაიმე თხოვნა ამ რეზოლუციასთან დაკავშირებით. იმ პერიოდში ვხვდებოდით შვეიცარიის დელეგაციის წარმომადგენლებს, ბატონ ლომბარდის, რომელიც ასევე არ მონაწილეობდა კენჭისყრაში. ასევე კენჭისყრაში მონაწილეობა არ აქვს მიღებული საპარლამენტო ასამბლეის პრეზიდენტს, ბატონ აგრამუნტს, რომელიც “ევროპის სახალხო პარტიის“ ლიდერია. რეზოლუცია ეხება უკრაინას და არა საქართველოს - უკრაინის ტერიტორიციაზე აგრესიასა და ადამიანის უფლებების დარღვევას, ეს არ არის რეზოლუცია საქართველოზე, უკრაინის ტერიტორიაზეა და ჩვენ უკვე უკრაინის ტერიტორია გავხდით?! თუ საქართველო უკრაინის ტერიტორია გახდა, მაშინ მითხარით! სახელწოდებას ხომ უნდა მივაქციოთ ყურადღება“, - განუცხადა ჟურნალისტებს ეკა ბესელიამ. 

ბესელიამ აქვე ხაზგასმით აღნიშნა, რომ შვეიცარია-საქართველოს მეგობრობის ჯგუფის ხელმძღვანელ ფილიპო ლომბარდისთან შეხვედრისას არჩევნების შედეგებთან და იმ მომავალ თანამშრომლობაზე ისაუბრეს, რაც ქვეყნის ინტერესებშია.