ე.წ. ისლამური პოლიციის უფროსმა აბუ უსმანმა ”ისლამური სახელმწიფოს” მეთაურის აბუ ბაქრ ალ-ბაღდადის წინააღმდეგ ამბოხი დაიწყო. ამის შესახებ ინფორმაციას ტელეარხი As Sumaria ავრცელებს.

მედიის ცნობით, ალ-ბაღდადიმ მის დაქვემდებარებაში მყოფ ელიტურ ფორმირებებს  გადატრიალების მცდელობისთვის წინააღმდეგობის გაწევისკენ მოუწოდა და ისლამური პოლიციის ხელმძღვანელობის განადგურების ბრძანება გასცა. წყაროს ინფორმაციით, მოსული  ქაოსშია გახვეული. ”ისლამურ სახელმწიფოში” დაპირისპირებულ სამხედრო ქვედანაყოფებს შორის აფეთქებები არ წყდება.

ტელეარხის თანახმად, ”ისლამური პოლიციის” წარმომადგენელთა თქმით, ტერორისტების მეთაური სირიის ქალაქ რაქის მიმართულებით გაიქცა, მისი ცოლი კი დაპატიმრებულია. ამბოხის ხელმძღვანელები აცხადებენ, რომ ”მოსულში ალ-ბაღდადის მმართველობა დასრულდა”.

მოსულის გათავისუფლების ოპერაცია დღეს დილით დაიწყო. სამხედრო ოპერაციაში ერაყის არმია, ქურთთა გასამხედროებული ფორმირებები და ანტიტერორისტული სართაშორისო კოალიციის სამხედრო ავიაცია მონაწილეობს. ცოტა ხნის წინ გავრცელდა ინფორმაცია, რომ კოალიციის მიერ მოსულში განხორციელებულ ავიაიერიშებს აბუ ბაქრ ალ-ბაღდადი ცოცხალი გადაურჩა. ლიკვიდირებულია ათობით მებრძოლი. მათ შორის ბაღდადის უახლოესი თანამებრძოლი აბუ მუსა ალ-მაღრიბი.