”ისლამური სახელმწიფოს” მებრძოლებმა  მოსულის გათავისუფლების ოპერაციას თვითმკვლელთა აფეთქებებით უპასუხეს. ერთ-ერთი ასეთი აფეთქებისას 70-მდე ერაყელი სამხედრო დაიღუპა.

თავდაპირველად თვითმკვლელმა თავი მოსულის აღმოსავლეთით, სოფელ ბილავეტთან აიფეთქა. აფეთქების ხმა იმ დროს გაისმა, როდესაც ამ რაიონში ერაყის არმიის კოლონა იმყოფებოდა.

ქურთული სააგენტოს Firat-ის ინფორმაციით, თავდასხმას 70-მდე ჯარისკაცი ემსხვერპლა. თვითმხილველთა თქმით, დანაღმული ავტომობილი ერაყის არმიის ტანკს შეეჯახა.

მეორე ინციდენტი სოფელ შეიხ ამირის რაიონში მოხდა. თვითმკვლელი ცდილობდა შეჯახებოდა ავტომობილს, რომელშიც ჟურნალისტები და ქურთი რაზმელები იმყოფებოდნენ. საბოლოოდ ტერორისტის თავდასხმა ქურთმა რაზმელებმა აღკვეთეს და თვითმკვლელის მანქანა ააფეთქეს,

მოსულზე იერიში გუშინ გამთენიისას დაიწყო. მედიის ინფორმაციით, 3000-4500 ისლამისტის წინააღმდეგ ოპერაციაში 80 ათასი სამხედრო იბრძვის.