ნატო რუსეთთან კონფრონტაციას არ ეძებს და ცივი ომის განმეორება არ სურს. ამის შესახებ ნატოს გენერალურმა მდივანმა იენს სტოლტენბერგმა  ”ბი ბი სისთან” ინტერვიუში განაცხადა.

როგორც ცნობილია, შავი ზღვის რეგიონი NATO-ს კონტროლის ქვეშ გადადის. ალიანსის საზღვაო, სახმელეთო და საჰაერო ძალები ერთობლივად დაიცავენ რეგიონს, რუსეთის შესაძლო აგრესიული ქმედებებისგან. ორდღიანი მინისტერიალი ბრიუსელში ერთ-ერთი ყველაზე მნიშვნელოვანი გადაწყვეტილებით დასრულდა. NATO შავი ზღვაში სამხედრო კონტინგენტს აძლიერებს.

ასევე სტოლტენბერგმა მიმდინარე კვირას განაცხადა, რომ ნატოს წევრი ქვეყნები მზად არიან აღმოსავლეთ ევროპაში სამხედროები განათავსონ. ნატოს ოთხი ბატალიონი -კანადის, აშშ-ის, დიდი ბრიტანეთისა და გერმანიის მეთაურობით განლაგდება ლატვიის, პოლონეთის, ესტონეთისა და ლიტვის ტერიტორიაზე. ბატალიონები ამ ქვეყნებში 2017 წლის დასაწყისში განთავსდება.

სტოლტენბერგის თქმით, ნატო არ მიიჩნევს, რომ რუსეთი გარდაუვალ საფრთხეს წარმოადგენს. ალიანსი ამით უკრაინის ტერიტორიაზე რუსი სამხედროების ყოფნას და ბირთვულ რიტორიკას პასუხობს, რომელსაც რუსეთი ევროპის ქვეყნების დასაშინებლად იყენებს.