ალმა-ატელ ტერორისტს სასიკვდილო განაჩენი გამოუტანეს
10 ადამიანის მკვლელობაში ბრალდებულ რუსლან კულეკბაევს სასამართლომ სასიკვდილო განაჩენი გამოუტანა. თავდასხმა ალმა-ატაში 18 ივლისს მოხდა. კულეკბაევმა უშიშროების სამსახურის შენობასთან ცეცხლი გახსნა, რასაც 8 სამართალდამცავი და 2 სამოქალაქო პირი ემსხვერპლა. პროცესზე 26 წლის განსასჯელმა დანაშაული აღიარა და განაცხადა, რომ საკუთარ საქციელს არ ნანობს. კულეკბაევის თქმით, მან მუსულმანი ძმების შევიწროვებისთვის იძია შური.
