მონტენეგროს ხელისუფლების ძალადობრივი გზით ხელში ჩაგდების მცდელობის უკან რუსი ნაციონალისტები იდგნენ. ამის შესახებ მონტენეგროს სახელმწიფო პროკურორმა მილივოი კატნიჩიმ განაცხადა. მისი თქმით, რუსი ნაციონალისტები გეგმავდნენ პრემიერ-მინისტრის მილო ჯუკანოვიჩის მკვლელობასაც.  

”ამ დანაშაულებრივი ჯგუფის ორგანიზატორები იყვენენ რუსი ნაციონალისტები, რომლებიც ფიქრობდნენ, რომ მონტენეგროს მთავრობის არჩევნების გზით შეცვლა შეუძლებელი იქნებოდა და ის ძალადობრივი გზით უნდა დამხობილიყო”, - განაცხადა პროკურორმა.

მისი თქმით, მათ პრემიერის მოკვლა ჰქონდათ განზრახული და ოპოზიციას პარლამენტის დაკავებაში დახმარებას ჰპირდებოდნენ. მისივე განცხადებით, ტერორისტული ოპერაციის სამზადისი მონტენეგროს, სერბეთისა და რუსეთის ტერიტორიაზე მიდმინარეობდა.

16 ოქტომბერს, საპარლამენტო არჩევნების დღეს,  ტერაქტების მომზადებისთვის სერბეთის 20 მოქალაქე დააკავეს. მოგვიანებით კი ასევე ტერორისტული აქტების მომზადებისთვის ქვეყნიდან რამდენიმე რუსი ეროვნების პირი გააძევეს.