სირიის პრეზიდენტი ბაშარ ასადი იმედოვნებს, რომ აშშ-ის არჩეული პრეზიდენტი დონალდ ტრამპი ისლამისტებთან ბრძოლაში მისი მოკავშირე იქნება, თუმცა ამერიკელი მილიარდერის პიროვნების შეფასებისგან ამ ჯერზე თავს იკავებს.

ამასთან სირიის პრეზიდენტი ეჭვობს, რომ მისი ამერიკელი კოლეგა დაპირებებს შეასრულებს.

ტრამპი ამტკიცებდა, რომ აზრსმოკლებული იქნებოდა ერთდროულად სირიის სამთავრობო არმიისა და ”ისლამური სახელმწიფოს” წინააღმდეგ ბრძოლა. ის ასევე ამბობდა, რომ სირიის არმიასთან ბრძოლამ შესაძლოა რუსეთთან კონფლიქტი გამოიწვიოს.

ასადი პორტუგალიის ტელევიაზიასთან ვრცელ ინტერვიუში ტრამპს ”ბუნებრივ მოკავშირეს” უწოდებს.

”ჩვენ არაფრის თქმა შეგვიძლია იმასთან დაკავშირებით თუ რის გაკეთებას აპირებს ის, მაგრამ.... თუ ის ტერორიზმთან ბრძოლას გეგმავს, რა თქმა უნდა, ჩვენ მისი მოკავშირეები ვიქნებით, ბუნებრივი მოკავშირეები, როგორც რუსეთის, ირანისა და ბევრი სხვა ქვეყნის შემთხვევაში”, - განაცხადა ასადმა.