სირიაში ალეპოს აღმოსავლეთ ნაწილიდან მოსახლეობის ევაკუაციის შესახებ ახალი შეთანხმება მიღწეულია, ამის შესახებ სირიის ოპოზიციის წარმომადგენლები აცხადებენ.

მათი თქმით, შეთანხმება ძალაში ხუთშაბათს დილით უნდა შევიდეს. მოსკოვი ამ ინფორმაციას ჯერჯერობით არ ადასტურებს, ”ფრანც პრესის”სირიის ხელისუფლებასთან დაახლოებულმა  წყარომ კი ეს ინფორმაცია უარყო.

ამასთან ბაშარ ასადის მხარეს მყოფმა მებრძოლებმა სააგენტო ”როიტერს” ახალი შეთანხების” ფაქტი დაუდასტურეს. მათი თქმით, ქალაქის დატოვება ამბოხებულებს, მათ ოჯახებსა და ყველა მსურველს შეეძლება.

მანამდე მიღწეული შეთანხმება ევაკუაციის შესახებ, რომლის გარანტად რუსეთი და თურქეთი გამოვიდა, ძალაში შესვლისთანავე დაირღვა. მშვიდობიანი მოსახლეობის ევაკუაცია გუშინ ადგილობრივი დროით  დილის 5 საათიდან უნდა დაწყებულიყო.

რუსული მხარე ცეცხლის განახლებაში ამბოხებულებს ადანაშაულებდა.

ამასთან  ალეპოში ბი ბი სის არაბული სამსახური აცხადებს, რომ თავდასხმა ამბოხებუელბს არ განუხორციელებიათ, მათი მონაცემებით, ცეცხლი ნაღმტყორცნებიდან სახელისუფლებო არმიამ გახსნა.

”ბიბისის” ინფორმაციით, ქალაქის აღმოსავლეთ ნაწილში 50 ათასამდე მშვიდობიანი მოსახლეობა იმყოფება.

რამდენიმე მათგანმა შეძლო, სოციალური ქსელით ეთხოვა მსოფლიოსთვის, გადარჩენაში დახმარებოდნენ.

ქალაქის აღმოსავლეთით მცხოვრებმა აქტივისტმა, ლინა შეიმიმ „ტვიტერზე“ ვიდეომიმართვაში აღნიშნა :

”ასადმა და ირანელებმა ცეცხლის შეწყვეტის შესახებ შეთანხმება დაარღვიეს, გენოციდი კვლავ გრძელდება. ადგილობრივი მოსახლეობა ქალაქშია კვლავ ჩაკეტილი და არავის შეუძლია ალეპო დატოვოს“.

”გასულ ღამეს დადებული ხელშეკრულების მიუხედავად, სახელისუფლებო ძალები ინტენსიურად უხსნიან ცეცხლს ალეპოს.“ ამბობს, ”სიენენის” სირიელი ჟურნალისტი ბილალ აბდულ ქარიმი

ქარიმი წერს, რომ ამბოხებულები მზად არიან დანებდნენ და ქალაქიდან გავიდნენ.

კიდევ ერთი ალეპოელი აქტივისტი, სალაჰ აშკარი კი წერს, რომ მოსახლეობა პანიკაშია და თავშესაფრებს ეძებს.

7 წლის ბანას ტვიტერზე წერს:

”მე ბანა ვარ, 7 წლის. ახლა მსოფლიოს ალეპოს აღმოსავლეთ ნაწილიდან ველაპარაკები. ახლა, შესაძლოა, ჩემი ცხოვრების ბოლო წუთები იყოს”.

მშვოდობიანი მოსახლეობის გარდა ქალაქის ამ ნაწილში  400-მდე ამბოხებულიც იმყოფება.