ჩვენ გვესმის მოსახლეობის წინაშე არსებული პრობლემები და გვესმის ყველაზე უკეთ, ძალიან ადვილია ასეთ დროს პოლიტიკური ქულების დაწერა ჩვენი ოპონენტების მხრიდან, მაგრამ მინდა ვთქვა, რომ ეს ვითარება აუცილებლად შეიცვლება, ვინაიდან ჩვენ ვგრძნობთ პასუხისმგებლობას,- ამის შესახებ საქართველოს პრემიერ-მინისტრმა, გიორგი კვირიკაშვილმა მთავრობის სხდომაზე განახცადა.

"ეს არ არის ველოსიპედის გამოგონება,  ამ შემთხვევაში ის ნაბიჯები მაქვს მხედველობაში, რომელსაც ჩვენ ვდგამთ. საქართველო იწყებს ძალიან მნიშვნელოვან განვითარების პროცესს, ეს არ იქნება მარტივი, მაგრამ ეს პროცესი საქართველოს ეკონომიკას გააჯანსაღებს, რაც საქართველოს ჩააყენებს განვითარებული აღმოსავლეთ-ევროპული ქვეყნების რიგებში,  საქართველოს მოსახლეობას აღარ ექნება ის პრობლემები, რომელზეც ჩვენ დღეს ვსაუბრობთ. ყველა ნაბიჯი რომელსაც, ჩვენ ვდგამთ მიმართულია აქეთკენ და ჩვენ გვაქვს სრული პასუხისმგებლობა ამ პროცესზე",-აღნიშნა გიორგი კვრიკაშვილმა.

პრემიერმა მიმართა მოქალაქეებს, რომ ამ პროცესებს ჯანსაღი თვალით შეხედონ.

"მინდა, კიდევ ერთხელ მოვუწოდო ყველა ჩვენს თანამოქალაქეს, რომ ამ პროცესში შეხედოს ჯანსაღი თვალით. იცოდეს, რომ სახელმწიფოც დგამს  ნაბიჯებს. ჩვენ ვაკეთებთ 10%-იან ოპტიმიზაციას. გვესმის, რომ 30%-ით შეამცირეთ ხარჯები, მათემატიკურად ეს შესაძლებელია, მაგრამ ეს არის აბსოლუტურად უპასუხისმგებლო მიდგომა,რომელზეც ჩვენ არავითარ შემთხვევაში არ წავალთ. ჩვენ ვამცირებთ ხარჯებს იმ დონეზე, რა დონეზეც ეს შეგვანარჩუნებინებს ჯანსაღი განვითარების დინამიკას, ვაკეთებთ საგადასახადო ლიბერალიზაციას იმ მიმართულებაში, რომელიც ყველაზე მეტად აისახება ეკონომიკური ზრდის დინამიკა,  ვაკეთებთ გადასახადების ზრდას იმ მიმართულებებზე, რომელსაც ყველაზე ნაკლები უარყოფითი გავლენა ექნება ეკონომიკურ ზრდაზე. თითოეული ჩამონათვალიდან, თითოეული ნაბიჯი სწორედ აქეთკენ არის მიმართული, რომ შევქმნათ სწორი განვითარების პროცესი, მოხდეს სტრუქტურილი გაჯანსაღება , ჩვენი სავაჭრო ბალანსი გაჯანსაღდეს, რათა ჩვენ ნაკლებად ვიყოთ დამოკიდებული უცხოური ვალუტის რყევებზე და ჩვენმა მოსახლეობამ ერთხელ და სამუდამოდ დაივიწყოს სავალუტო კურსი და შეხედოს მხოლოდ და მხოლოდ ფასთა დონის ცვლილებას და ინფლაციას.
ეს პროცესი მარტივი არ იქნება,მაგრამ სრული პასუხისმგებლობით ვაცხადებ, რომ ეს პროცესი არის ერთადერთი სწორი ამონახსნი იმ გამოწვევებისა, რაც ჩვენს წინაშე დგას",-განაცხადა გიორგი კვირიკაშვილმა.