ანკარაში მოკლული რუსეთის ელჩის ანდრეი კარლოვის მეუღლის მარინა კარლოვას მიერ პოლიციისთვის მიცემულ ჩვენებას რუსული მედია ავრცელებს. ის ვარაუდობს, რომ მისი მეუღლე საავადმყოფოში მიყვანამდე გარდაიცვალა.

„ყველასთან ერთად, მეც იატაკზე ვიწექი. გამოფენაზე უამრავი ადამიანი იყო. ყველანი შოკირებული ვიყავით მომხდარის გამო. გონზე რომ მოვედი, უკვე საავადმყოფოში მივდიოდით. მგონია, რომ ჩემი ქმარი უკვე მკვდარი იყო. მას 11-ჯერ ესროლეს. პრინციპში, ჩვენ დაცვა არ გვყოლია. იშვიათად, თარჯიმანი გვახლდა.
როდესაც საავადმყოფოში მივედით, ანკარის მერი და ჯანდაცვის სამინისტროს თანამშრომლები მოვიდნენ, დიდხანს ისაუბრეს და შემატყობინეს, რომ ჩემი მეუღლე გარდაიცვალა. შოკში ვარ, ძალიან ცუდად გავხდი. ჩემს ქმარს ცუდი არავისთვის გაუკეთებია, მას არავინ ემუქრებოდა, თორემ მეცოდინებოდა. ჩვენ რომ ფოტოგამოფენაზე მივდიოდით, ბევრმა იცოდა, რადგან ეს ღონისძიება წინასწარ იყო დაგეგმილი“, – განუცხადა მარინა კარლოვამ თურქ სამართალდამცველებს.