თბილისის 142-ე საჯარო სკოლაში გაიმართა გაეროს ახალგაზრდული კლუბის გახსნის ღონისძიება.

გაეროს ახალგაზრდული კლუბის მიზანია ხელი შეუწყოს საქართველოს მოსწავლე-ახალგაზრდობას გაეროს მდგრადი განვითარების სამუშაო გეგმის გაცნობაში, გაეროს პრინციპების გათავისებასა და განხორციელების პროცესებში წვლილის შეტანაში.

კლუბის გახსნის იდეა ეფუძნება არასამთავრობო ორგანიზაციის „მრავალეროვან საქართველო დემოკრატიული ღირებულებების განმტკიცებისათვის“ მიერ ორგანიზებულ სკოლის დირექტორთა სტაჟირების პროგრამის ფარგლებში მიღებულ გამოცდილებას ამერიკის შეერტებულ შტატებში.

„ჩვენ ვართ პირველები, ვინც საფუძველი ჩაუყარა გაეროს ახალგაზრდულ კლუბს. იმედი მაქვს, რომ ყველა სკოლა დაინტერესდება, რადგან ეს არის სიახლე, ინოვაცია და შემოგვიერთდებიან სხვადასხვა სკოლის მოსწავლეებიც“, - განაცხადა ჩვენთან საუბრისას 142-ე სკოლის დირექტორმა შორენა ცნობილაძემ.

კლუბის გახსნას ესწრებოდა საქართველოს პარლამენტის განათლების, მეცნიერებისა და კულტურის კომიტეტის თავჯდომარე მარიამ ჯაში, თბილისის საკრებულოს სახელდებისა და სიმბლოკის კომისიის თავჯდომარე ლია ჯახველაძე და საქართველოს ახალგაზრდობის წარმომადგენელი გაეროში თათია დოლიძე.

„მომხრე ვარ, რომ არაფორმალური განათლების ელემენტები შევიდეს სკოლებში და არამხოლოდ სკოლებში. ძალიან მნიშვნელოვანია, რომ ასეთი მინიმალური დაფინანსებით, მხოლოდ მოტივაციაზე დაყრდნობით გაეროს ახალგაზრდული კლუბი გაიხსნა, რასაც თვითონ ახალგაზრდები უძღვებიან და კარგი იქნება თუ ეს სხვადასხვა საჯარო სკოლებზე გავრცელდეს და ეს იყოს მთავრობის ხელშეწყობით მოხდეს წახალისება არაფორმალური კლუბების შექმნის, თუნდაც თავდაპირველად საჯარო სკოლებში“, - განაცხადა საქართველოს ახალგაზრდობის წარმომადგენელმა გაეროში თათია დოლიძემ.

„დღეს, 142-ე საჯარო სკოლაში დაფუძნდა გაეროს ახალგაზრდული კლუბი. ეს გახლავთ ინიციატივების ერთ-ერთ პლატფორმა, რომელიც რეალურად აძლევს საშუალებას სკოლის მოსწავლეებსა და სტუდენტებს, აქტიურად იყვნენ ჩართული გაეროს მდგრადი განვითარების მიზნების, ზოგადად გაეროს სისტემასთან დაკავშირებულ ინიციატივებში. ჩემთვის განსაკუთრებით საინტერესო იყო აღნიშნულ ღონისძიებაში მონაწილეობა, როგორც განათლების მეცნიერებისა და კულტურის კომიტეტის თავჯდომარის სტატუსით და ასევე, როგორც გაეროს ყოფილი თანამშრომელი“, - განაცხადა „პრაიმნიუსჯორჯიასთან“ საუბრისას საქართველოს პარლმენტის განათლების, მეცნიერებისა და კულტურის კომიტეტის თავჯდომარემ მარიამ ჯაშმა.