აუდიო-ვიზუალურ სერვისებში უცხოური კომპანიების მონაწილეობის აკრძალვის შესახებ კანონპროექტის მიღების შემთხვევაში, YouTube, შესაძლოა, იძულებული გახდეს რუსეთი დატოვოს. ამის შესახებ ინფორმაციას რუსული მედია ავრცელებს.

მასობრივი ინფორმაციის საშუალებების შესახებ კანონის ანალოგიურად, ამ კანონპროექტის მიღების შემთხვევაში, 2017 წლიდან, უცხოელ მესაკუთრეებს, პროფესიონალური კონტენტის შემცველ აუდიო-ვიზუალური სერვისის კომპანიებში, 20 პროცენტზე მეტი წილის ქონა შეეზღუდებათ. აღნიშნული კანონპროექტი განსახილველად რუსეთის სახელმწიფო დუმაში 25 ნოემბერს წარადგინეს.

რუსეთის მედიაკომუნიკაციების კავშირის ინფორმაციით, ეს აკრძალვა შეეხება Youtube-საც, ვინაიდან აღნიშნულ არხზე იდება როგორც პროფესიონალური ისე არაპროფესიონალური კონტენტი.

კანონპროექტის მიღებამ კი, შესაძლოა რუსეთიდან YouTube-ის წასვლა გამოიწვიოს. რუსეთში YouTube-ზე ინტერნეტ ტრაფიკის საერთო მოხმარების 30 პროცენტზე მეტი მოდის.