აჭარის მთავრობის თავმჯდომარემ ზურაბ პატარაძემ აჭარის ფინანსთა და ეკონომიკის მინისტრ რამაზ ბოლქვაძესთან ერთად ბათუმის ბულვარის უფროსის თანამდებობაზე ეთერ მაჭუტაძე წარადგინა.ზურაბ პატარაძემ ბულვარის ადმინისტრაციის ყოფილ ხელმძღვანელს ცისკარ გოგიტიძეს გაწეული მუშაობისთვის მადლობა გადაუხადა და შემდგომ საქმიანობაში წარმატებები უსურვა.
ეთერ მაჭუტაძის ეფექტურ საქმიანობაზე აჭარის ფინანსთა და ეკონომიკის მინისტრმა ისაუბრა. რამაზ ბოლქვაძემ აღნიშნა,რომ ახალი ხელმძღვანელი ბევრ სასიკეთო საქმეს განახორციელებს და კიდევ უფრო განავითარებს ბათუმის ბულვარს:
"გილოცავთ თქვენ, ბათუმის ბულვარს და მთლიანად ქალაქს ქალბატონი ეთერის ბათუმის ბულვარის ხელმძღვანელად დანიშვნას. ქალბატონ ეთერს აღნიშნულ სფეროში მუშაობის საკმაოდ დიდი - 27 წლიანი გამოცდილება აქვს. ძალიან ეფექტურად ხელმძღვანელობდა და ასევე მთავარი აგრონომი იყო აჭარის ისეთი ღირსშესანიშნავი და უმნიშვნელოვანესი ადგილის როგორიც ბათუმის ბოტანიკური ბაღია, რომელიც იმ პერიოდში კიდევ უფრო განვითარდა. მინდა ასევე აღვნიშნო, რომ გარდა ამ სფეროში უდიდესი პრაქტიკული გამოცდილებისა ქალბატონი ეთერი სამეცნიერო საქმიანობასაც ეწევა.
მჯერა ბათუმის ბულვარში ის კიდევ უფრო ბევრ სასიკეთო საქმეს გააკეთებს. დაიცავს ბათუმის ბულვარს, არსებული იერსახის შენარჩუნებით უფრო განავითარებს და ქალაქის ერთ-ერთი სავიზიტო ბარათი კიდევ უფრო მიმზიდველი გახდება უცხოელი და ქართველი ვიზიტორებისთვის"- განაცხადა რამაზ ბოლქვაძემ.