საპარლამენტო უმრავლესობის წევრი ზაქარია ქუცნაშვილი ,,ნაციონალურ მოძრაობაში“ განვითარებულ პროცესებს დღეს გამართულ პრესკონფერენციაზე გამოეხმაურა და განაცახდა, რომ ოპოზიციური პარტიების დაშლის პროცესი იანვარ-თებერვალში დასრულება.

,,საპარლამენტო არჩევნებმა დასაბამი დაუდო ოპოზიციური პარტიების დაშლის პროცესს და ვფიქრობ, იანვარ-თებერვალში დასრულება ოპოზიციური პარტიების (ყველაზე აქტიურ პარტიებს ვგულისხმობ) დაშლის პროცესი. მე არ ჩამოვთვლი იმ პარტიებს, რომლებმაც ეს მოასწრეს 2016 წლის გვიან შემოდგომაზე. კარგი თუ ცუდია, ეს უკვე ამომრჩევლის გადასაწყვეტია. მე ყოველთვის ვამბობ, რომ დემოკრატიულ განვითარებას, პრობლემების აქტუალიზაციას, ხელისუფლების ფორმაში ყოფნას ძალიან სჭირდება კვალიფიციური ოპოზიციის არსებობა. თუ კვალიფიციური ოპოზიცია არ გეყოლა, ასეთ შემთხვევაში ნებისმიერი ხელისუფლება მოდუნდება. დემოკრატიულ სისტემებში ყველა სახელისუფლებო პარტია ადრე თუ გვიან იყო ოპოზიციური პარტია, ამიტომ ქვეყანას სჭირდება ოპოზიციური სპექტრის არსებობა. აქ რაიმე ხელოვნური ჩარევა კიდევ უფრო დამაზიანებელი იქნებოდა. ბუნებრივი გადარჩევის პროცესი მიდის, ზოგიერთ პარტიაში ძალიან მტკივნეულადაც, ზოგიერთმა შედარებით ნაკლებად მტკივნეულად გადაიტანა ეს პროცესი, მაგალითად, „თავისუფალმა დემოკრატებმა“ ერთ კვირაში დაასრულეს ეს. „რესპუბლიკურმა პარტიამ“ - ერთ თვეში. ე.წ. „ერთიანმა ნაციონალურმა მოძრაობამ“ დაკარგა ერთიანობის სახელის ტარების უფლება, დაიშალა 3-4 ნაწილად და საკმაოდ მტკივნეულად მიდის ის პროცესი, რომელსაც ყველა ვაკვირდებით. ჩემი პროგნოზი, რომ ისინი დაიშლებოდნენ ადგილობრივი თვითმმართველობის არჩევნების შემდეგ, არ გამართლდა. უფრო ადრე დაიშალნენ მესამე და მეოთხე ნაწილად, ვიდრე ველოდებოდი მე მათ ლოგიკურ დაშლას“, - განაცხადა ქუცნაშვილმა.

მისი შეფასებით, მიხეილ სააკაშვილი და მისი ჯგუფი აგრესიული, ძალადობრივი გადაწყვეტების მომხრე ფრთაა, ხოლო დანარჩენები არიან საარჩევნო გზით პოლიტიკაში ყოფნის გზის მომხრეები.

„ეს ორი განსახვავებული შეხედულება შეეჯახა ერთმანეთს. ჩვენი როლი ამ საქმეში მხოლოდ ერთ რამეში გამოიხატება, ჩვენ მივეხმარეთ მათ გაეაზრებინათ, რომ ნებისმიერი სისტემის და მმართველობის დამარცხება შესაძლებელია არჩევნების გზით და ამის მაგალითი იყო 2012 წლის პირველი ოქტომბერი“, - განაცხადა ქუცნაშვილმა.

მისი თქმით, ეს ორი ჯგუფი ალბათ, მრავალი თვის განმავლობაში იქნება დაპირისპირებულ რეჟიმში.

,,პოლიტიკის კანონი გვკარნახობს, რომ რომელიღაცამ უნდა გაიმარჯვოს რომელიღაცაზე. სხვა შემთხვევაში, ჩვენ შეიძლება მივიღოთ სიტუაცია, რომ ორივე მიიღებს მონაწილეობას ადგილობრივი თვითმმართველობის არჩევნებში და ორივე დადგება დამარცხების რისკის ქვეშ“, - განაცხადა ქუცნაშვილმა.