პარლამენტი იმისთვის არის, რომ დებატები იმართებოდეს და არ არის პრობლემა, - განაცხადა იურიდიულ საკითხთა კომიტეტის თავმჯდომარე ეკა ბესელიამ საპარლამენტო უმცირესობის მოთხოვნასთან დაკავშირებით.

,, არაერთი კომენტარი უკვე გააკეთა ყველა პირველმა პირმა, მათ შორის მინისტრმა, რომელიც მოლაპარაკებებს აწარმოებდა. ქვეყნის საწინააღმდეგოდ არ გადაიდგმება და არ გადადგმულა არც ერთი ნაბიჯი. არ მიიღება არც ერთი გადაწყვეტილება, რომელიც ჩვენი ქვეყნის ინტერესებს და სუვერენიტეტს კითხვის ნიშნის ქვეშ დააყენებს. პარლამენტი ამისთვის არის, რომ დებატები იმართებოდეს და არ არის პრობლემა", - განაცხადა ეკა ბესელიამ.

საპარლამენტო უმცირესობა „გაზპრომის“ თემაზე პარლამენტის პლენარული სხდომის ფორმატში პოლიტიკური დებატების გამართვას ითხოვს. 

როგორც ფრაქცია „ევროპული საქართველოს“ თავმჯდომარემ სერგო რატიანმა ჟურნალისტებს განუცხადა, მას შემდეგ, რაც ენერგეტიკის მინისტრმა კახა კალაძემ უმცირესობის ფრაქციებთან შეხვედრაზე უარი თქვა, რითაც მინისტრმა კანონი დაარღვია, მათი მოთხოვნაა პარლამენტში პოლიტიკური დებატების გამართვა.