2016 წელს ჩინეთში 17,86 მლნ ადამიანი დაიბადა, რაც 2000 წლის შემდეგ შობადობის ყველაზე მაღალი დონეა.

ასეთი მაჩვენებლის მიღწევა გასაკვირია იმის ფონზე, რომ ჩინეთში შვილების გაჩენის უნარის მქონე ქალთა რაოდენობა 5 მლნ ადამიანით არის შემცირებული.

შედარებისთვის 2011-2015 წლებში შობადობა 1,4 მლნ ადამიანით ნაკლებს შეადგენდა. ამიტომაც ჩინეთის ხელისუფლება მიიჩნევს, რომ პოლიტიკის ”ერთი ოჯახი - ერთი ბავშვი” გაუქმება ძალიან დროული და ეფექტური” აღმოჩნდა.

ჩინეთმა დემოგრაფიულ პოლიტიკაში შესწორებების შეტანა 2015 წლის ოქტომბერში გადაწყვიტა. მმართველმა კომუნისტურმა პარტიამ ოჯახებს ორი შვილის ყოლის უფლება მისცა.

პოლიტიკა ”ერთი ოჯახი -ერთი ბავშვი” 1979 წელს შემოიღეს, რათა მოსახლეობის ზრდა შეეჩერებინათ. მათთვის, ვისაც ორი შვილის გაჩენა სურდათ, გათვალისწინებული იყო ჯარიმები და სხვა სანქციები.

შედეგად მომუშავე მოქალაქეების რაოდენობამ შემცირება დაიწყო. ამჟამად ხელისუფლება შიშობს, რომ მომუშავე ჩინელები ხანდაზმული მოსახლეობის შენახვას ვეღარ შეძლებენ.