ფრიდრიხ ებერტის ფონდის კვლევის მიხედვით, საქართველოში მცხოვრები და გამოკვლევაში მონაწილე ახალგაზრდების აბსოლუტური უმრავლესობა თავს რომელიმე რელიგიურ მიმართულებას აკუთვნებს.

კვლევის შედეგებით, გამოკითხული ახალგაზრდების აბსოლუტურ უმრავლესობას, ანუ 97 პროცენტს სჯერა ღმერთის არსებობის. ასევე, 80 პროცენტს სჯერა სამოთხისა და ჯოჯოხეთის არსებობის, ამავდროულად შედარებით ნაკლებ წილს, 75 პროცენტს სჯერა იმის, რომ მორალური ნორმები და მოვალეობები ღმერთისგან მომდინარეობს.

კვლევის შედეგების მიხედვით, უმრავლესობა ანუ 85 პროცენტი მართლმადიდებელი ქრისტიანია ხოლო 10 პროცენტი მაჰმადიანი. მცირე ნაწილი მიაკუთვნებს თავს აპოსტოლურ ეკლესიას 2 პროცენტი, კათოლიკე ქრისტიანს 1 პროცენტი, ათეისტს 1 პროცენტი და სხვა აღმსარებლობას 1 პროცენტი.

ქვეყნის მასშტაბით ჩატარებული კვლევა მოიცავდა 14-29 წლის ახალგაზრდებს. კვლევა ჩატარდა 2016 წლის მაისი-ივნისის პერიოდში. კვლევის მეთოდოლოგია მოიცავდა პირისპირ ინტერვიუებს და ფოკუსჯგუფის დისკუსიებს. ჯამში, მთელი ქვეყნის მასშტაბით ჩატარდა 1200 პირისპირ ინტერვიუ. კვლევის ფოკუსს წარმოადგენდა ახალგაზრდა თაობის სოციალურ-ეკონომიკურ თემებთან არსებული გამოცდილებისა და დამოკიდებულებების შესწავლა.