თავისუფალი ადამიანები მოიპოვებენ კეთილდღეობას, დაიცავენ საკუთარ უსაფრთხოებას და თავისუფალი ადამიანები უზრუნველყოფენ ეკონომიკურ წინსვლას, - ეს განცხადება, მოძრაობა „თავისუფლებისთვის-ევროპული საქართველოს" ერთ-ერთმა ლიდერმა გიგა ბოკერიამ, პარტიის პრეზენტაციაზე სიტყვით გამოსვლისას გააკეთა.

მისივე თქმით, ხელისუფლებაში უნდა მოვიდეს ის პოლიტიკური ძალა, რომელიც დაიცავს ქვეყნის და თითოეული მოქალაქის თავისუფლებას.

„ვიწყებთ თვითმმართველობის არჩევნებით, სადაც უნდა მოვიყვანოთ ხალხი თვითმმართველობაში, რომელიც ემსახურება ჩვენს მოქალაქეებს და არა ოლიგარქს. მერე მთელ ქვეყანაში უნდა გამოვცვალოთ ივანიშვილის რეჟიმი და რაც მთავარია, ამის შემდეგ უნდა დავიწყოთ საქმის კეთება ამ ქვეყნისთვის, ძლიერი გუნდით, რომელიც შეზღუდულია კონსტიტუციით და რომელიც არის ხალხის წინაშე ანგარიშვალდებული. ძლიერი გუნდით, რომელიც დაიცავს ჩვენი ქვეყნის, თითოეული მოქალაქის თავისუფლებას და როგორც უკვე ითქვა, თავისუფალი ადამიანები მოიპოვებენ კეთილდღეობას, დაიცავენ საკუთარ უსაფრთხოებას და თავისუფალი ადამიანები უზრუნველყოფენ ეკონომიკურ წინსვლას და ამ ქვეყნის საბოლოო დაბრუნებას თავისუფალ ერთა ოჯახში,“ - განაცხადა გიგა ბოკერიამ.