27 ოქტომბერს საქართველოს ეკონომიკისა და მდგრადი განვითარების მინისტრი დიმიტრი ქუმსიშვილი ავღანეთის ისლამური რესპუბლიკის ვაჭრობისა და მრეწველობის მინისტრ ჰუმაიუნ რასას შეხვდა.

შეხვედრის დასაწყისში, დიმიტრი ქუმსიშვილმა სამძიმარი გამოთქვა 26 ოქტომბერს ავღანეთში მომხდარი ძლიერი მიწიძვრისას გარდაცვლილთა გამო, რომლის დროსაც ასობით ადამიანი დაიღუპა.

შეხვედრაზე საუბარი წარიმართა ორი ქვეყნის ეკონომიკურ ურთიერთობებსა და შემდგომი თანამშრომლობის ძირითადად მიმართულებებზე.

ავღანეთის მინისტრმა დიდი ინტერესი გამოთქვა საქართველოში განხორციელებული და მიმდინარე რეფორმების მიმართ. აღინიშნა, რომ მათი მეშვეობით საქართველოში მნიშვნელოვნად გაუმჯობესდა ბიზნეს-გარემო და ქვეყანა გახდა უცხოური კაპიტალისთვის ერთერთი მიმზიდველი ბაზარი მსოფლიოს მაშტაბით.

ასევე საუბარი წარიმართა მეწარმეობის ხელშეწყობის სამთავრობო პროგრამებზე, რომელსაც საქართველოს მთავრობა ახორციელებს. ავღანეთის მინისტრი განსაკუთრებით დაინტერესდა პროგრამით „აწარმოე საქართველოში“. აღინიშნა, რომ 2013-2015 წლებში მეწარმეობის ხელშეწყობის მეშვეობით ადგილობრივმა კერძო სექტორმა 60 ათასზე მეტი ახალი სამუშაო ადგილი შექმნა.

შეხვედრაზე ყურადღება გამახვილდა აბრეშუმის გზის სატრანზიტო კორიდორსა და თბილისის აბრეშუმის გზის ფორუმზე, რომლის მუშაობაში ავღანეთის სამთავრობო დელეგაციამაც მიიღო მონაწილეობა. ავღანეთის მინისტრმა აღნიშნულ მიმართულებას მნიშვნელოვანი უწოდა როგორც საქართველოსთვის, ასევე ავღანეთისთვის.

შეხვედრაზე მხარეებმა ასევე ისაუბრეს თანამშრომლობის პერსპექტივებზე ტურიზმის, ინოვაციების, ტრანსპორტის, ლოგისტიკის და სხვა მიმართულებით.