ევროპარლამენტი დღეს პლენარულ სხდომაზე საქართველოსთან უვიზო მიმოსვლის შესახებ რეგულაციას უყრის კენჭს. კენჭისყრამდე დაგეგმილია პოლიტიკური დებატები, რომელიც თბილისის დროით 12:00 საათისთვის დაიწყება.

საქართველოს საკითხზე მომხსენებელი მარია გაბრიელი კოლეგებისგან მხარდაჭერას ელოდება. მისი ვარაუდით, პროცედურა ოფიციალურად გამოქვეყნებიდან 20 დღეში დასრულდება.

"ეს არის ძალიან პოზიტიური სიგნალი. კოლეგებისგან ველი მხარდაჭერას. ჩემი, როგორც მომხსენებლის მიზანია მოვიპოვო ხელმოწერა პირველ ან 2 მარტს. შემდეგ მოხდეს გადაწყვეტილების გამოქვეყნება ოფიციალურ ჟურნალში, რაც შეიძლება სწრაფად , 10 მარტამდე. ამის შემდეგ მხოლოდ 20 დღე მოგვიწევს ლოდინი უვიზო მიმოსვლის ძალაში შესვლამდე. თუმცა განვაგრძობ მოთხოვნას, რომ ეს მოხდეს მარტის ბოლომდე,"-განაცხადა ევროპარლამენტის წევრმა, საქართველოს საკითხზე მომხსენებელმა მარია გაბრიელმა. 

გადაწყვეტილების მიღების შემთხვევაში, საქართველოს მოქალაქეებს ევროპაში გამგზავრება უვიზოდ მარტის ბოლოდან უნდა შეეძლოთ. კენჭისყრის პროცესს ევროპარლამენტში დაესწრება საქართველოს საპარლამენტო დელეგაციაც.