ამერიკის პრეზიდენტმა დონალდ ტრამპმა განაცხადა, რომ აშშ ნატოს სრულიად უჭერს მხარს, თუმცა ჩრდილოატლანტიკური ალიანსის წევრები გააფრთხილა, რომ მათ აუცილებლად უნდა გადაიხადონ დადგენილი საფასური.  

”ჩვენ მტკიცე მხარდაჭერას ვუცხადებთ ნატოს. მხოლოდ ვთხოვთ, რომ ნატოს წევრებმა სრულიად შეიტანონ სავალდებულო ფინანსური წვლილი, რასაც მათი უმეტესობა არ აკეთებს. ბევრი მათგანი ახლოსაც არ არის ამ ვალდებულებასთან”, - განაცხადა ტრამპმა ფლორიდის სამხედრო-საჰაერო ბაზაზე სიტყვით გამოსვლისას.

მანამდე პრეზიდენტმა ალიანსის გენერალურ მდივანთან იენს სტოლტენბერგთან სატელეფონო საუბრისას მაისში ნატოს ლიდერებთან შეხვედრაზე თანხმობა განაცხადა.

თეთრი სახლის განცხადების თანახმად, ტრამპმა და სტოლტენბერგმა განიხილეს საკითხი იმასთან დაკავშირებით, თუ როგორ უნდა იმოქმედონ იმისათვის, რომ ნატოს წევრებმა თავდაცვის ხარჯებზე დაკისრებული მოვალეობა შეასრულონ.

შეგახსენებთ, რომ ტრამპმა წინასაარჩევნო კამპანიის დროს არაერთხელ აღნიშნა, რომ ნატო მოძველებული ორგანიზაციაა, რომელმაც თავისი როლი ამოწურა.

ამჟამად ნატოს 27 წევრი ქვეყნიდან მხოლოდ ხუთი (ისლანდიას საკუთარი არმია არ ჰყავს) თავდაცვისთვის ხარჯავს მშპ-ის 2 პროცენტს.