თურქეთში მიწისძვრების სერია შესაძლოა ხელოვნურად იყოს გამოწვეული. ამის შესახებ ანკარის მერმა მელიჰ გიოქჩექმა განაცხადა. მისი თქმით, ამის გაკეთება იმ ძალებს შეეძლოთ, რომლებმაც ივლისში სახელმეიფო გადატრიალება სცადეს.

ხმელთაშუა ზღვის სეისმოლოგიური ცენტრის ინფორმაციით, ბოლო ორი დღის განმავლობაში თურქეთის დასავლეთ სანაპიროზე რამდენიმე 5,2 და 5,3 მაგნიტუდის მიწისძვრა დაფიქსირდა. დაზიანდა 102 სახლი და დაშავდა 5 ადამიანი.

”მოხდა სერიოზული მიწისძრვა ჩანაკალში. გავარკვიე, რომ რომელიღაც ხომალდი სეისმურ კვლევებს ატარებდა . აუცილებელია დადგინდეს, რა გემია ის და რომელ ქვეყანას ეკუთვნის. ვღელავ მიწისძვრაზე, რომელიც შესაძლოა ხელოვნურად იყოს გამოწვეული, საჭიროა გამოძიება და საზოგადოებისთვის ინფორმაციის მიწოდება”, - წერს გიოქჩექი Twitter-ში.

მისი თქმით, მიწისძვრა შესაძლოა გამოეწვია იმ ძალებს, რომლებმაც თურქეთში გასული წლის ივლისში სახელმწიფო გადატრიალება სცადეს. მომხდარზე პასუხისმგებლობა ხელისუფლებამ ოპოზიციონერ მუსლიმ მქადაგებელს ფეთჰულაჰ გიულენს ადანაშაულებს.