საქართველოს კანონის პროექტი „შვილად აყვანისა და მინდობით აღზრდის შესახებ“ კანონპროექთა პაკეტი პარლამენტის დღევანდელ პლენარულ სხდომაზე მირიან წიკლაურმა, I მოსმენით, წარადგინა. მისი განმარტებით, პრინციპების დონეზე ხდება გასაშვილებელი და მინდობით აღზრდას დაქვემდებარებული ბავშვისთვის უპირატესი გარემოს განსაზღვრა და აღიარება - ბავშვის ბიოლოგიურ ოჯახში აღზრდა, მეურვეობა/მზრუნველობა, შვილად აყვანა, მინდობით აღზრდა.

წარმოდგენილი კანონპროექტი ადგენს შვილად აყვანისა და მინდობით აღზრდის წესსა და პირობებს, არეგულირებს ურთიერთობებს, რომლებიც მათი განხორციელებისას წარმოიქმნება სახელმწიფოსა და მშვილებელს/მინდობით აღმზრდელს შორის, ასევე ბავშვის წარმოშობისა და მიმღებ სახელმწიფოებს შორის. განისაზღვრება შვილად აყვანისა და მინდობით აღზრდის პროცედურების განმახორციელებოლი ორგანოები, აქვე განისაზღვრება მეურვეობისა და მზრუნველობის ორგანოების კომპეტენცია აღნიშნულ სფეროში. რეგულირდება ბავშვის მიტოვებულად აღიარებასთან და მშობლის უფლების ჩამორთმევა-შეჩერებასთან დაკავშირებული ზოგადი საკითხები. კანონპროექტში მოცემულია საერთაშორისო შვილად აყვანის მარეგულირებელი ნორმები. განისაზღვრება შვილად აყვანის გაუქმებისა და ბათილად ცნობის საფუძვლები, აგრეთვე მინდობით აღზრდასთან დაკავშირებული საკითხები.

მომხსენებლის თქმით, კანონპროექტით, სავალდებულო მოთხოვნად განისაზღვრა შვილად აყვანის და მინდობით აღზრდის მსურველი პირებისთვის მშვილებელთა ან მინდობით აღმზრდელთა მიერ სავალდებულო მოსამზადებელი კურსის გავლა - სერტიფიცირება. 
კანონპროექტით ხდება, მშვილებელსა და გასაშვილებელ ბავშვს შორის მაქსიმალური ასაკობრივი სხვაობის დადგენაც. განისაზღვრა, რომ ასაკობრივი სხვაობა არ უნდა იყოს 45 წელზე მეტი.

წარმოდგენილი პროექტით, ნასამართლობასთან დაკავშირებული პირობები მკაცრდება, საქართველოში მუდმივად მცხოვრები იმ პირებისთვის, რომელთაც ბავშვის შვილად აყვანა სურთ. კერძოდ, პირი ვერ იქნება მშვილებელი, თუ იგი ნასამართლევია კანონპროექტში გასაზღვრული სისხლის სამართლის კოდექსის გარკვეული მუხლებით, მიუხედავად იმისა მოხსნილი ან გაქარწყლებული აქვს თუ არა ნასამართლობა.

„აღნიშნულ ცვლილებით წესდება ბავშვის უფლებების დაცვის, მისი ოჯახში სრულფასოვნად აღზრდის მაღალი სტანდარტი, რაც თავის მხრივ, ამცირებს ბავშვის არასათანადო პირობებში მოხვედრის რისკებს“, - განაცხადა მირიან წიკლაურმა. მანვე განმარტა, რომ მეურვეობისა და მზრუნველობის ადგილობრივი ორგანო ერთი და იმავე მშვილებელი პირებისთვის, რეესტრში აღრიცხული ბავშვის შვილად აყვანის მიზნით, მხოლოდ 2 შეთავაზებას ახორციელებს.

„კანონპროექტითგამოკვეთილია მთავარი მიზანი - ბავშვი იზრდებოდეს ოჯახურ გარემოში და მის საუკეთესო ინტერესების დაცვას ემსახურებოდეს,“, - განაცხადა იურიდიულ საკითხთა კომიტეტის თავმჯდომარემ ეკა ბესელიამ. მან გარკვეულ შენიშვნებზეც გაამახვილა ყურადღება თუმცა, როგორც აღნიშნა ამ საკითხებზე მუხლობრივი განხილვების დროს იმსჯელებენ.

„ეს არის მნიშვნელოვანი კანონი. მართებულია, რომ პარლამენტმა ძალიან დეტალურად იმსჯელოს და ისე მივიღოთ გადაწყვეტილება. ამ სათაურის ქვეშ გაერთიანებულია ადამიანის ბედი, დატვირთული ისტორიები - როგორც ემოციურად, ისე ფსიქოლოგიურად. ჩვენ მხარს ვუჭერთ ამ ინიციატივას თუმცა, დარწმუნებული ვარ, მეორე მოსმენისთვის, კიდევ უფრო დაზუსტებით გავარჩევთ თუ როგორი გადაწყვეტილება არის უმჯობესი თითოეულ მუხლთან დაკავშირებით“, - განაცხადა გიორგი წერეთელმა.