ძალადობრივი დანაშაულები, მათ შორის ფოტოგრაფების საქმე უნდა იყოს გამოძიებული, - ამის შესახებ ადამიანის უფლებების საკითხებში პრეზიდენტის მრჩეველმა კახა კოჟორიძემ ჟურნალისტებს განუცხადა.

მისივე განმარტებით, აღნიშნულთან დაკავშირებით პრეზიდენტის ადმინისტრაცია არასამთავრობო ორგანიზაციების პოზიციას იზიარებს.

"ამ შეხვედრებზე ძირითადად საუბარი შეეხო იმ უამრავ ძალადობრივ დანაშაულს, რომელიც მოხდა და რომელზეც მრავალ შემთხვევაში არ არის პასუხი დამთავრებული გამოძიების და კანონიერ ძალაში შესული განაჩენების სახით. არასამთავრობო ორგანიზაციების წარმომადგენლების მესიჯი იყო, რომ ეს საქმეები აუცილებლად ითხოვს გამოძიებას და არ შეიძლება ამაში არ დაეთანხმო. თითოელი საქმე, რომელშიც ასეთ მძიმე დანაშაულზეა საუბარი, რა თქმა უნდა, კანონის მოთხოვნათა დაცვით უნდა იქნას გამოძიებული და ის პირი, რომელიც შემსრულებელი, ორგანიზატორი თუ დამკვეთი იყო, აუცილებლად უნდა იქნეს პასუხისგებაში მიცემული. საილუსტრაციოდ თუნდაც ფოტოგრაფების საქმე კმარა, რომლებსაც პრეზიდენტი დღეს ასევე შეხვდა. ამ საქმესთან დაკავშირებითაც დღემდე არ არის გამოძიება სათანადოდ წარმართული, ამიტომ, რა თქმა უნდა, ვუერთებით ჩვენ იმას, რომ თითოელ ამ საქმეზე, მათ შორის ფოტოგრაფების საქმეზე უნდა იყოს გამოძიება ჩატარებული", - განაცხადა კოჟორიძემ.