ხვალ, 24 თებერვალს, 11:00 საათზე სასტუმრო „ქორთიარდ მარიოტში“ (წვეულებათა დარბაზი N2, მეორე სართული) საქართველო-ისრაელის ბიზნეს პალატა და „ისრაელის სახლი“  ისრაელიდან ჩამოსული 100-მდე სტუმრის - ისრაელის მედიის წარმომადგენლების, ექსპერტების, ბიზნესმენების, ფინანსისტების, იურისტების, ისრაელში საზოგადოებრივი აზრის შემქნელების მონაწილეობით, გამართავენ 2017 წლის სამოქმედო გეგმის პრეზენტაციას.

ღონისძიებას დაესწრებიან თბილისის მერი დავით ნარმანია და ისრაელის კომპანია „დორონ თრეველის“ ხელმძღვანელობა. ბ-ნ დავით ნარმანია ისრაელელ სტუმრებს გააცნობს თბილისის საინვესტიციო პოტენციალს და იმ საინვესტიციო პროექტებს, რომელსაც თბილისის მერია საქართველო-ისრაელის ბიზნეს პალატასთან თანამშრომლობით განახორციელებს, როგორც გასული წლების წარმატებული ორმხრივი ვიზიტების გაგრძელებას.

საქართველო-ისრაელის ბიზნეს პალატა და „ისრაელის სახლის“ სამოქმედო გეგმა მიზნად ისახავს საქართველოს კიდევ უფრო უკეთ გაცნობას ისრაელისა და მსოფლიო ებრაელობისთვის, მისი პოტენციალის წარმოჩენა-პოპულარიზაციას.

ბიზნეს პალატის ხელმძღვანელისა და „ისრაელის სახლის“ დამფუძნებლის, იციკ მოშეს თქმით, საქართველოს პოპულარიზაციის მიზნით, წელს საქართველოს კიდევ ეწვევა  საზოგადოებრივი აზრის შემქმნელი 500-მდე წარმომადგენელი ისრაელიდან, ხოლო კომპანია „დორონ თრეველი“ ისრაელიდან 10 ათასი ტურისტის შემოყვანას გეგმავს. ისრაელელებისა და მსოფლიო ებრაელობისთვის შემუშავდა ებრაული კულტურული მემკვიდრეობის ახალი მარშრუტიც. მასში მოექცევა თბილისში ქართველი შინდლერების ხსოვნის პარკიც, რომელის გახსნაც, „ისრაელის სახლის“ ინიციატივით და თბილისის მერიის მხარდაჭერით, წელს, გაზაფხულზე იგეგმება.

საქართველო ისრაელის ბიზნეს პალატა წელს ორგანიზებას გაუკეთებს, აგრეთვე, ორ ბიზნეს ფორუმს,  ისრაელის პარლამენტის - ქნესეთის დავალებით აქტიურად ჩაერთვება ისრაელ-საქართველოს დიპლომატიური ურთიერთობების 25 წლის იუბილესადმი მიძღვნილ ღონისძიებებში.

2017 წლის სამოქმედო გეგმის პრეზენტაციაზე საუბარი შეეხება აგრეთვე, ჰაი-ტექსა და სოფლის მეურნეობაში ისრაელის წარმატებული მოდელების გადმოტანას, ისრაელიდან ინვესტიციების მოზიდვის საკითხს, ახალ ბიზნესპროექტებს, უვიზო მიმოსვლასთან დაკავშირებულ პრობლემებს.

ღონისძიებას  ბიზნეს პალატისა და „ისრაელის სახლის“ ხელმძღვანელი იციკ მოშე წარუძღვება.