გუანტანამოს ციხიდან გათავისუფლების შემდეგ დიდი ბრიტანეთის კიდევ ერთი მოქალაქე სირიაში მებრძოლებს შეურთდა. ამის შესახებ გაზეთი  Times-ის წერს.

როგორც გამოცემა იტყობინება, მამაკაცი აბუ მუგჰერ ალ-ბრიტანის ფსევდონიმით, სავარაუდოდ სირიაში ”ალ-ქაიდას” მებრძოლებს შეურთდა. შესაბამისი დასკვნა გამოცემამ ალ-ბრიტანის მიერ ინტერნეტში გამოქვეყნებული სტატიის საფუძველზე გააკეთა, სადაც ის მადლობას უხდის ”ალაჰს გათავისუფლებისა და ჯიჰადის განხორციელების შესაძლებლობის მიცემისთვის”.

როგორც ცნობილია, მანამდე, გუანტანამოს ყოფილმა პატიმარმა, ბრიტანეთის მოქალაქემ ჯამალ ალ-ჰარითმა ერაყის ქალაქ მოსულთან მდებარე სამხედრო ბაზასთან თავი აიფეთქა. მან გუანტანამოს ციხე 2004 წელს დატოვა და ბრიტანეთში დაბრუნდა. მედიის ცნობით, ჰარითს დიდი ბრიტანეთის მთავრობამ  ციხეში გადატანილი წამებისთვის 1 მლნ ფუნტი სტერლინგის ოდენობის კომპენსაცია გადასცა.

დიდი ბრიტანეთის ყოფილმა პრემიერ-მინისტრმა ტონი ბლერმა განაცხადა, რომ მის მთავრობას ალ-ჰარითისთვის კომპენსაცია არ გადაუხდია. ბრიტანეთის პრემიერის ოფიციალური წარმომადგენლის თქმით, კი  მტკიცებულება იმის შესახებ, რომ გუანტანამოს ყოფილი პატიმარი, რომელმაც მოსულთან ტერაქტი მოაწყო, ბრიტანეთის მოქალაქე იყო, არ არსებობს.