ნდობის ჯგუფის ფორმირებასთან დაკავშირებით, შესაძლოა, პარლამენტის რეგლამენტში ცვლილება შევიდეს. პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი აღნიშნავს, რომ ნდობის ჯგუფის ფორმირებაზე გადაწყვეტილებას ძალიან მალე მიიღებენ. თუმცა, სავარაუდოდ, ჯგუფი მეხუთე წევრის გარეშე დარჩება.

"თქვენ იცით, იმ ე.წ. პროცედურული დილემის წინაშე, რაც იმაში მდგომარეობს, რომ შეიძლება მეხუთე წევრი ვერ ავირჩიოთ, ვერ დავამტკიცოთ. "ნაციონალურ მოძრაობას" და "საქართველოს პატრიოტთა ალიანსს" ნდობის ჯგუფში წარმოდგენილი ჰყავთ საკუთარი კანდიდატურები. თითოეულ მათგანს ექვს-ექვსი მხარდამჭერი ჰყავს და არც ერთს არ აქვს შვიდი ხმა, რაც საფუძველია იმისა, რომ ვერც ერთი ვერ შევიდეს ნდობის ჯგუფში.ეს დილემა შეიძლება გადაიჭრას მხოლოდ რეგლამენტში ცვლილებების გზით. დაინტერესებულ მხარეებს ვთავაზობ, რეგლამენტში ცვლილებასთან დაკავშირებით, წინადადება წარმოადგინონ“, - განაცხადა სესიაშვილმა. 

ნდობის ჯგუფში ირმა ინაშვილისა და სალომე სამადაშვილის კანდიდატურებია წარდგენილი. დამოუკიდებელი დეპუტატი სალომე ზურაბიშვილი არცერთი მათგანის მხარდაჭერას არ გეგმავს.