ხელისუფლებას მშვიდად უყურებდა, როგორ იწვოდა და ნადგურდებოდა წლების განმავლობაში აშენებული ბათუმის ქუჩები , - ამის შესახებ დღეს გამართულ ბრიფინგზე ”ნაციონალური მოძრაობის” აჭარის ორგანიზაციის ლიდერმა, ლევან ვარშალომიძემ განაცხადა.

მისივე თქმით, ხელისუფლება ჩადგა სირაქლემას პოზაში და საკუთარ მოქალაქეებთან საუბარზე უარი განაცხადა.

”ბათუმში მომხდარ ვანდალურ ფაქტზე სრული პასუხისმგებლობა ცალსახად ეკისრება საქართველოს ხელისუფლებას. ყველამ კარგად იცის, რომ ეს სპონტანური აქცია არ გამოწვეულა და არ გამოუწვევია საპატრულო პოლიციის მიერ იმ კონკრეტულ დღეს დაწერილ ჯარიმას. ეს ჯარიმა ბოლო წვეთი იყო იმ უსამართლობისა, ნეპოტიზმისა, კორუფციისა და მძიმე სოციალური ფონისა, რაც ბოლო 5 წლის განმავლობაში სუფევდა ჩვენს რეგიონში და მთლიანად საქართველოში. ნაცვლად იმისა, რომ ხელისუფლების პასუხისმგებელი პირები გამოსულიყვნენ და დალაპარაკებოდნენ საკუთარ მოსახლეობას, რომელიც 10 საათის განმავლობაში მშვიდობიან საპროტესტო აქციას მართავდა, ხელისუფლება ჩადგა სირაქლემას პოზაში და საკუთარ მოქალაქეებთან საუბარზე უარი განაცხადა,” - განაცხადა ლევან ვარშალომიძემ.

ბათუმში ვითარება 11 მარტს, საღამოს ჭავჭავაძის ქუჩაზე მომხდარი ინციდენტისას დაიძაბა. პოლიციამ 2 მოქალაქე მას შემდეგ დააკავა, რაც პატრულის თანამშრომელმა ერთ-ერთი მათგანი დააჯარიმა, რასაც იქ მყოფ მოქალაქეებსა და პოლიციელებს შორის დაპირისპირება მოჰყვა. მოგვიანებით, პოლიციამ გოგებაშვილის ქუჩაზე მიმდინარე აქციაზე კიდევ 4 პირი დააკავა.

აქციის მონაწილეებმა ქალაქის პოლიციის სამმართველოსთან გადაინაცვლეს. აქციაზე შეკრებილები დაკავებული პირების გათავისუფლებას, საპატრულო პოლიციის უფროსის გადადგომას და, აგრეთვე, პატრულის მიერ ჯარიმების გახშირებული დაწერის ფაქტებს აპროტესტებდნენ.აჭარის პოლიციის სამმართველოს წინ აქციაზე მოგვიანებით სპეცრაზმი გამოჩნდა. მას აქციის მონაწილეებმა ქვები დაუშინეს და უკან, ეზოში შეაბრუნეს. სპეცრაზმმა შაშხანებით და ცრემლსადენი გაზით დაიწყო აქციის მონაწილეთა დაშლა.