მექსიკის ვერაკრუსის შტატში ნარკომაფიის საიდუმლო სამარხში კიდევ 50-მდე ადამიანის თავის ქალა აღმოაჩინეს. ამის შესახებ ინფორმაციას ადგილობრივი მედია ვერაკრუსის პროკურატურაზე დაყრდნობით ავრცელებს.

მანამდე გავრცელებული ინფორმაციით კი, კოლინას-დე-სანტა-ფეს რაიონში 250 ადამიანის ნეშთი იპოვეს. ექიმების ცნობით, ცხედრები 14-დან 25 წლამდე ორივე სქესის ადამიანებს ეკუთვნის. ჯერჯერობით გათხრილია სამარხის ერთი მესამედი. ექსპერტების აზრით, სამარხში გაცილებით მეტი ცხედარი უნდა იყოს მოთავსებული.

პროკურატურის განცხადებით, დადგენილია მათი ნაწილის ვინაობა. უმეტესი მათგანი 2016 წელს უგზო-უკვლოდ დაკარგულებად მიიჩნეოდნენ.

2010 წელს ვერაკრუსში უგზოუკვლოდ 720 ადამიანი დაიკარგა. მექსიკის ყურის სანაპიროზე მდებარე ეს შტატი დიდი ხანია ორი ნარკოკარტელის  დაპირისპირების არენად არის გადაქცეული.