დღეს, 17:00 საათზე აფხაზეთის განათლებისა და კულტურის სამინისტროს ვ. არქანიას დარბაზში გაიმართება  თემატური ფერწერული ნახატების გამოფენა სახელწოდებით „ბედნიერი საქართველო“ ბედნიერების საერთაშორისო დღის აღსანიშნავად.

ბედნიერების საერთაშორისო დღე პირველად 2013 წელს  გაერთიანებული ერების ორგანიზაციის მიერ დაწესდა იმის აღსანიშნავად, თუ რამდენად მნიშვნელოვანია  ბედნიერება ადამიანებისთვის მთელს მსოფლიოში. ხოლო, 2015 წელს გაერომ შეიმუშაბა 17 მდგრადი განვითარების გეგმა, რომელიც ემსახურება სიღარიბისა და უთანასწორობის  აღმოფხვრასა და ჩვენი პლანეტის დაცვას - ეს ის სამი ძირითადი ასპექტია, რომელსიც უზრუნველყოფს ადამიანების კეთილდღეობასა და ბედნიერებას.

ღონისძიებაზე ასევე,  გაიმართება გაეროს  საერთაშორისო კონფერენციის ორგანიზატორების და რეგიონალური ლიდერების დაჯილდოების ცერემონიალი. გაეროს კონფერენცია  ამა წლის თებერვლის თვეში ნიუ-იორკის გაეროს შტაბბინაში გაიმართა. ღონისძიებაზე გამოფენილი ნამუშევრების  ინსპირაცია და შექმნაც გაეროს კონფერენციის ორგანიზატორებს ნინი და დიმიტრი დუმბაძეებს ეკუთვნის.

ღონისძიების ორგანიზატორები არიან: აფხაზეთის უმაღლესი საბჭო და ა(ა)იპ მრავალეროვანი საქართველო დემოკრატიული ღირებულებების განმტკიცებისათვის.