1-ელ ნოემბერს თურქეთში, ჩატარებულ ვადამდელ საპარლამენტო არჩევნებში მმართველმა კონსერვატიულმა "სამართლიანობისა და განვითარების" პარტიამ გაიმარჯვა. ბიულეტენების 99%-ის დათვლის შემდეგ ცნობილი გახდა, რომ პრეზიდენტ რეჯეფ ტაიფ ერდოღანის გუნდს არჩევნებში მონაწილეთა 49,4%-მა მისცა ხმა. ქვეყნის პრემიერ-მინისტრმა მხარდამჭერებს გამარჯვება უკვე მიულოცა. ახმედ დავიდოღლუმ მათ სიტყვით მიტინგზე მიმართა. განცხადება გააკეთა პრეზიდენტმა ერდოღანმაც და აღნიშნა, რომ მოსახლეობამ თურქეთის "ერთობასა და ერთიანობას" დაუჭირა მხარი.

ბოლო 5 თვის განმავლობაში საპარლამენტო არჩევნები თურქეთში უკვე მეორედ გაიმართა. წინა არჩევნების შედეგებით, თურქეთის სამართლიანობისა და განვითარების პარტიამ უმრავლესობის მოპოვება ვერ შეძლო, თუმცა ახლა ერდოღანის პარტია საკანონმდებლო ორგანოში უმრავლესობის შექმნას და მთავრობის ფორმირებას შეძლებს.