ხუთმა მილიონმა ევროპელმა საუკუნის ბოლოს შესაძლოა  საცხოვრებელი სახლი წყალდიდობების გამო დაკარგოს. ამის შესახებ ევროკომისიის კვლევითი ცენტრის განცხადებაშია ნათქვამი.

მეცნიერების აზრით, გლობალური დათბობის შედეგად ზღვების, მათ შორის ჩრდილოეთ და ბალტიის ზღვების დონე კრიტიკულ ნიშნულს მიაღწევს და ევროპის სანაპიროს ნაწილი წყლის ქვეშ აღმოჩნდება. დათბობის ასეთი მაღალი ტემპის პირობებში წყალდიდობა ყოველ წელს იქნება მოსალოდნელი.

ექსპერტების თქმით, ევროპის ქვეყნების უმრავლესობა კლიმატის ცვლილებებისთვის ტექნიკურად მზად არ არიან. ამიტომ მათ შესაძლო კატაკლიზმებისთვის მზადება ამ წუთიდანვე უნდა დაიწყონ. ბოლო ათი წლის განმავლობაში ევროპაში რამდენიმე დიდი მასშტაბის წყალდიდობა მოხდა. ყველაზე სახიფათო კი 2013 წელი აღმოჩნდა, როდესაც ნაწილობრივ დაიტბორა ლატვია, მაკედონია და  ჩეხეთი. წყალდიდობამ ასევე დააზარალა ნორვეგია და გერმანია.

2016 წელს მკვეთრად მოიმატა მდინარეების სენას, დუნაის, რეინისა და ნეკარის წყლის დონემ. რამაც ამ მდინარეების ნაპირის გასწვრივ წყალდიდობები გამოიწვია. პარიზსა და მის შემოგარენში საშიშროების მეხუთე- ნარინჯისფერი დონე გამოცხადდა. საფრანგეთის ჩრდილოეთ რაიონებიდან კი რამდენიმე ათასი ადამიანის ევაკუაცია გახდა საჭირო.