გერმანიის საგარეო საქმეთა მინისტრმა ზიგმარ გაბრიელმა ბელარუსში მიტინგების დარბევა დაგმო და ხელისუფლებას დაკავებულების გათავისუფლებისკენ მოუწოდა.

”დაკავებულები დაუყოვნებლივ უნდა გათავისუფლდნენ. არ შეიძლება ადამიანების დაკავება და და მათთვის განაჩენის გამოტანა მხოლოდ იმიტომ, რომ თავიანთ აზრს გამოხატავენ”, -განაცხადა მინისტრმა.

გასულ შაბათს მინსკსა და სხვა ქალაქებში გაიმართა ოპოზიციის მიტინგები. აქციები არასანქცირებული იყო. მილიციამ მინსკის ცენტრალურ პროსპექტზე მიტინგის მონაწილეებს მსვლელობის ორგანიზების საშუალება არ მისცა. უფლებადამცველთა თქმით, დაკავებულია 700 მოქალაქე. ზოგიერთი მათგანი ოქმის შედგენის გარეშე გამოუშვეს, ზოგიერთის მიმართ კი ადმინისტრაციული სამართალდარღვევისთვის საქმე აღიძრა. საპროტესტო აქციები კვირასაც გაიმართა, რაც ასევე დაკავებებით დასრულდა.

გერმანელი მინისტრის თქმით, ბელარუსის ხელისუფლების ქმედება განგაშის საფუძველს იძლევა.

”ადამიანები, რომლებიც ქუჩებში გამოვიდნენ, თავიანთი უფლებებით სარგებლობდნენ, რაც ნებისმიერი პლურალისტური საზოგადოებისთვის არსებითია. ამისთვის ძალის დაპირისპირება არაადეკვატურია, ისევე როგორც მომიტინგეებისა და ჟურნალისტების დაკავება”, - აღნიშნა გაბრიელმა.