მთავარი პროკურორობის კანდიდატის ვინაობა გაირკვევა 19 ნოემბერს გაირკვევა, - ამის შესახებ იუსტიციის მინისტრმა საპროკურორო საბჭოს პირველი სხდომის დასრულების შემდეგ ჟურნალისტებთან გაკეთებულ კომენტარში განაცხადა.

თეა წულუკიანმა საპროკურორო საბჭოს ფუნქციები კიდევ ერთხელ განმარტა და განაცხადა, რომ საბჭოში არის 8 პროკურორი, 2 მოსამართლე, 1 ადვოკატი, 1 აკადემიური წრეებიდან წარმომადგენელი და 1 დეპუტატი. მისი თქმით, ამ საბჭოს ფუნქცია არ არის რომელიმე საქმეზე გამოძიების ჩატარება ან პროკურატურის ორგანოებისთვის მითითება, ესა თუ ის საქმე როგორ გამოიძიოს.

"დღეისათვის შემოსულია 3 კანდიდატურა. ესენია: კახი კახიშვილის, ირაკლი შოთაძის და პაატა შავაძის. კახი კახიშვილმა მოხსნა კანდიდატურა და აქედან გამომდინარე, სამწუხაროდ, მე მის შეყვანას სამკაციან სიაში ვეღარ შევძლებ. კონსულტაციები, იუსტიციის მინისტრსა და აკადემიურ წრეებს, არასამთავრობოებს შორის გაგრძელდება 13 ნოემბრამდე. 19 ნოემბერს, 11 საათზე საბჭო ისევ შეიკრიბება, სამი პირისგან შემდგარ სიას განიხილავს, უყრის კენჭს და რომელი კანდიდატურაც მიიღებს უფრო მეტ ხმას, ის იქნება წარდგენილი მთავრობის წინაშე. ჩვენ შევთანხმდით იმ თავისებურებებზე, როგორ უნდა ჩატარდეს კენჭისყრა 19 ნოემბრის სხდომაზე, ჩვენ უნდა გვქონდეს ბიულეტენები, ყუთი, დამკვირვებლებსაც მოვიწვევთ ვისაც სურვილი ექნება, მათ შორის, მედიას და 19 ნოემბრის შემდეგ მე უკვე შევძლებ, რომ გამარჯვებული კანდიდატი წარვუდგინო მთავრობას, რომელიც თავის მხრივ, ამ კანდიდატს ასარჩევად გადააგზავნის პარლამენტში", - განაცხადა თეა წულუკიანმა.