მოსულის ზოოპარკის გადარჩენილი  ბინადრები - დათვი და ლომი ქალაქის ტერიტორიიდან გაიყვანეს. ქალაქის დასავლეთ ნაწილს ჯერ კიდევ ”ისლამური სახელმწიფოს” მებრძოლები აკონტროლებენ.

გაზეთ Independent-ის ცნობით, ერაყის არმიამ რამდენიმე საათით მაშველებს გზა გაუწმინდა. მათ ზოოპარკის ტერიტორიაზე შესვლა მოახერხეს და დათვი - ლულა და ლომი - სიმბა საომარი მოქმედებების ზონიდან გამოიყვანეს. გადარჩენილი ცხოველები ქურთთა ავტონომიური ოლქის დედაქალაქ ერბილში გადაიყვანეს.

საომარი მოქმედებების დაწყებიდან  ცხოველების უმეტესობა ავიადარტყმებს ემსხვერპლა ან შიმშილისგან დაიღუპა.

ზოოპარკის ტერიტორიაზე სამი მაიმუნი, სამი ფარშევანგი, ორი თხა და ერთი ცხენი ისევ რჩებიან. ვეტერინარ ჰალილის თქმით, მათზე ადგილობრივი მცხოვრებლები შეძლებისდაგვარდ ზრუნავენ.