გიორგი მარგველაშვილი პარლამენტს მისი საპარლამენტო გამოსვლის ირგვლივ დებატების მოწყობას სთავაზობს. გიორგი მარგველაშვილის განცხადებით, იმ ფონზე, როცა ქვეყანაში პოლიტიკური დისკუსიის ნაკლებობაა, პარლამენტი სწორედ ის ადგილია, სადაც ასეთი ტიპის დისკუსიები უნდა იმართებოდეს.

„როდესაც ჩვენ ვლაპარაკობთ პარლამენტის ფუნქციაზე, მე მიმაჩნია, რომ პარლამენტი სწორედ ის ადგილია, სადაც სხვადასხვა პოლიტიკური შეხედულება უნდა ისმოდეს, უნდა იყოს მსჯელობა პოლიტიკურ თემებზე. ეს ნამდვილად სჭირდება ქართულ პოლიტიკურ კულტურას და მე ვიქნებოდი მოხარული, რომ ის რაც აქამდე სამწუხაროდ, ვერ ჩამოყალიბდა, რომ პრეზიდენტის გამოსვლას თან სდევდეს დებატები, ეს ტრადიცია შედგეს და პარლამენტმა რეალურად ამ გამოსვლის ირგვლივ დებატები მოაწყოს“, - აღნიშნა პრეზიდენტმა.

ეს განცხადება გიორგი მარგველაშვილმა ლიტვაში ოფიციალური ვიზიტის ფარგლებში გააკეთა. 

რა ფორმატით წარდგება პრეზიდენტი პარლამენტში ყოველწლიური ანგარიშით, ჯერ უცნობია. საპარლამენტო უმრავლესობა რეგლამენტით გათვალისწინებული იმ ფორმატის გამოყენებას გეგმავს, რომლის მიხედვით, პრეზიდენტის ანგარიშით გამოსვლის შემდეგ, სიტყვით მხოლოდ ფრაქციების თავმჯდომარეები გამოდიან. პარლამენტი პრეზიდენტის ყოველწლიურ მოხსენებას 7 აპრილის პლენარულ სხდომაზე მოისმენს. ანგარიშით გამოსვლას აღმასრულებელი ხელისუფლების წარმომადგენლები, მათ შორის მთავრობის მეთაური გიორგი კვირიკაშვილი დაესწრება.