პრეზიდენტი პარლამენტში გამოსვლისას, ისაუბრებს ყველა იმ მნიშვნელოვან თემაზე, რაც აწუხებს საზოგადოებას, - ამის შესახებ დღეს გამართულ ბრიფინგზე პრეზიდენტის პრესსპიკერმა ეკა მიშველაძემ განაცხადა.

„მოგეხსენებათ, უმრავლესობამ გაიზიარა პრეზიდენტის წინადადება სიტყვით გამოსვლის შემდეგ დებატების გამართვასთან დაკავშირებით, რასაც პრეზიდენტი დადებითად აფასებს. 
რაც შეეხება თავად გამოსვლის შინაარსს - პრეზიდენტი, პირველ რიგში, ისაუბრებს ყველა იმ მნიშვნელოვან თემაზე, რაც აწუხებს საზოგადოებას, ყურადღება გამახვილდება ქვეყნის წინაშე მდგარ საშინაო და საგარეო გამოწვევებზე, ეკონომიკურ და სოციალურ თემატიკაზე, სასამართლო და თავდაცვით სისტემებზე, უსაფრთხოებაზე, მედიის თავისუფლებაზე, ადამიანის უფლებებზე”, - განაცხადა მიშველაძემ.

მისივე თქმით, პრეზიდენტი ქუთაისში გამართავს შეხვედრებს ადგილობრივ მოსახლეობასთან, გაიმართება დისკუსია აკაკი წერეთლის სახელობის სახელმწიფო უნივერსიტეტში კამპანია „კონსტიტუცია ყველასია“ ფარგლებში, დემოკრატიული ჩართულობის ცენტრში სახელმწიფოს მეთაური შეხვდება პოლიტიკოსებს და არასამთავრობო ორგანიზაციების წარმომადგენლებს. ამასთან, მიშველაძის განცხადებით, საქართველოს სხვადასხვა რეგიონში გრძელდება პრეზიდენტის კამპანია „მოითხოვე ქართული“, ამჯერად, გიორგი მარგველაშვილი ქუთაისში ქართულ საწარმოებს ეწვევა. 

,,ეს პროექტი ქვეყნის ეკონომიკის გაძლიერებას, დამატებითი სამუშაო ადგილების შექმნას, ქართული პროდუქციის პოპულარიზაციას ისახავს მიზნად”, - განაცხადა მიშველაძემ.

7 აპრილს საქართველოს პარლამენტში პრეზიდენტის ყოველწლიური საპარლამენტო გამოსვლაა დაგეგმილი.