კ. გამსახურდიას სახელობის სახელმწიფო დრამატული თეატრი პრემიერისთვის ემზადება. „ნაბუშრები“ - ასე ჰქვია სპექტაკლს, რომელიც მარჯანიშვილის თეატრის სხვენში 11 აპრილს გაიმართება.

მარტინ მაკდონახის „ობოლი დასავლეთის" მიხედვით დაწერილი ზურაბ სამადაშვილის პიესა „ობლები’’, შავი კომედიაა. იგი გაჯერებულია მსუბუქი იუმორით და ზუსტად ასახავს დღევანდელ ქართულ რეალობას.

„თანამედროვე იგავი მოგვითხრობს ქალაქის გარეუბანში მცხოვრებ და გამუდმებით ერთმანეთში მოჩხუბარ ორი ძმაზე. უბნის ეკლესიის მსახური მამა იობი ხშირად არის ძმებთან და მუდამ მათ შერიგებას ცდილობს, ვიდრე ერთ - ერთი ჩხუბისას არ გაიგებს, რომ ერთ ძმას საკუთარი მამა ჰყავს მოკლული, ხოლო მეორე ამ ამბავს ძმის ქონების ხელში ჩაგდების მიზნითარ ამხელს. მამა იობი ვეღარ უძლებს ამდენიცოდვის ყურებას. ისედაც მთელი უბანი ცოდვებშია ჩაძირული, ,,ძმები ერთმანეთს სასიკვდილოდ იმეტებენ, გოგოები სპირტით ვაჭრობენ, ორი კაცის მკვლელი კი არხეინად დაიარება ქუჩაში“. იგი გადაწყვეტს, რწმენის მაგალითი აჩვენოს ხალხს და წყალზე გავლას შეეცდება, მაგრამ უშედეგოდ. ის იხრჩობა. თუმცა ამბობენ, რომ მან წყალზე  ორი ნაბიჯის გადადგმა შეძლო. ამ ამბის შემდეგ, ძმები გადაწყვეტენ მამა იობის დანაბარების თანახმად, ყველა წყენა და დანაშაული მოუყვნენ და მიუტევონ ერთმანეთს, მაგრამ სამწუხაროდ ეს ურთიერთაღსარებაც სისხლისმღვრელ ბრძოლად გადაიქცევა", - განაცხადა რეჟისორმა დავით საყვარელძემ.

პროექტი განხორციელდა საქართველოს კულტურისა და ძეგლთა დაცვის სამინისტროსა და თბილისის მერიის ხელშეწყობით.

მოქმედნი პირნი და შემსრულებელნი: მამა იობი - დიმიტრი ჯაიანი საქართველოს სახალხო არტისტი. ბეღო - მერაბ ყოლბაია, ტახო - ბადრი ბეგალიშვილი, ქეთი - ვერიკო კალანდია.

სპექტაკლში გამოყენებულია ამერიკელი აბორიგენების (ინდიელების) ფოლკლორი, ვ. ვისოცკის და “Systemofdown “ - ის მუსიკა.