პარლამენტში დეპუტატებმა დღეს პირველი მოსმენით მიიღეს კანონი თამბაქოზე კონტროლის გამკაცრებასთან დაკავშირებით. აღნიშნული ინიციატივა კრძალავს თამბაქოს რეკლამას, მარკეტინგულ აქტივობებსა და პროდუქტის გამოსაჩენ ადგილზე განთავსებას.

ცვლილებების პაკეტი შენობებში მოწევის აკრძალვასაც ითვალისწინებს. თამბაქოს მოხმარება აიკრძალება ყველა ტიპის შენობაში, გარდა სახლისა და საპატიმრო დაწესებულებისა. დამრღვევი იურიდიული პირი საწყის ეტაპზე 500 ლარით დაჯარიმდება, ხოლო განმეორების შემთხვევაში შეიძლება სასამართლომ 5000 ლარი დააკისროს.

კანონის მიღებას ეწინააღმდეგებიან მოვაჭრეები, მათი თქმით ეს ბიზნესს დააზარალებს და შემოსავლებს შეუმცირებს.

„აქ ძირითადად მოდიან თამბაქოს საყიდლად, აწი როგორ იქნება არ ვიცი. თუ ეს კანონი დამტკიცდება, ჩვენ უმუშევრები დავრჩებით. თუ რეკლამა არ იქნა და თამბაქოს ვერ შეხედა მომხმარელმა, ვერც გაიგებს აქ რა იყიდება.“- განაცხადა ერთერთმა მოვაჭრემ.

მოვაჭრეთა პრეტენზიების პასუხად ჯანდაცვის მინისტრმა დავით სერგეენკომ განაცხადა, რომ ამგვარი მიდგომა მოსახლეობის ჯანმრთელობის დაცვისკენაა მიმართული და ეს მეტად პრიორიტეტულია სახელმწიფოსთვის.

„რეფორმები, რომლებიც ახლა იწყება საქართველოში, მთელს მსოფლიოსა და მათ შორის პოსტსაბჭოთა სივრცეში დიდიხანია დაწყებულია. მათ თუ გაყიდვები შეუმცირდებათ ,მე პირადად გამიხარდება. ეს ჩვენ შეგვიმცირებს ჯანდაცვის ხარჯებს და ბევრი ადამიანი იცოცხლებს უფრო ჯანმრთელად.“-განაცხადა დავით სერგეენკომ.