საქართველოს ფინანსთა მინისტრი, ივანე ჯავახიშვილის სახელობის თბილისის სახელმწიფო უნივერსიტეტის პროფესორი, მაკროეკონომიკის კათედრის ხელმძღვანელი ნოდარ ხადური, უნივერსიტეტის ეკონომიკისა და ბიზნესის ფაკულტეტის დეკანი თეიმურაზ ბერიძე, ფინანსთა სამინისტროს მაკროეკონომიკური ანალიზისა და პროგნოზირების დეპარტამენტის ხელმძღვანელი ნიკოლოზ გაგუა და მაკროეკონომიკური კათედრის თანამშრომლები ევროკავშირის საჯარო ფინანსების პოლიტიკისა და მართვის რეფორმების პროექტის დირექტორს, ნანა მჟავანაძეს და პროექტის უფროს ექსპერტს, ლიანა სხირტლაძეს შეხვდნენ.
საუბარი შეეხო მაკროეკონომიკური პროგნოზირების მიმართულებით უნივერსიტეტის შესაძლებლობების გაძლიერებას და ამ მიმართულებით ევროკავშირის საჯარო ფინანსების პოლიტიკისა და მართვის რეფორმების პროექტის მხრიდან შესაძლო მხარდაჭერას. კერძოდ,
ეკონომიკისა და ბიზნესის ფაკულტეტის ბაზაზე მაკროეკონომიკური ლაბორატორიის შექმნას.
მაკროეკონომიკურ ლაბორატორიაში მოხდება თანამედროვე სტანდარტების შესაბამისი საჭირო პროგრამული უზრუნველყოფის დანერგვა, ელექტრონული ბიბლიოთეკის შექმნა, სადაც უნივერსიტეტის პროფესორ-მასწავლებლებსა და სტუდენტებს, ისე მკვლევარებსა და ექსპერტებს, წვდომა ექნებათ უახლეს ტექნოლოგიებთან, მეთოდურ და სასწავლო ლიტერატურასთან, კვლევებთან და გამოცემებთან, ლაბორატორიაში სტუდენტები ასევე შეძლებენ სასწავლო პრაქტიკის გავლას.

უნივერსიტეტის წარმომადგენელთა განცხადებით, დღეს ეკონომიკისა და ბიზნესის ფაკულტეტზე არსებობს ინტელექტუალური რესურსი იმისთვის, რათა ლაბორატორიამ შეძლოს წარმატებული ფუნქციონირება. 

როგორც შეხვედრაზე აღინიშნა, მსგავსი დამოუკიდებელი ლაბორატორიის შექმნა, მიზნად ისახავს, ქვეყანაში გაუმჯობესდეს მაკროეკონომიკური ანალიზისა და პროგნოზირების სისტემა, გაიზარდოს მისი სანდოობა, დაინერგოს ექსპერიმენტული ეკონომიქსის საფუძვლები და ამ მიმართულებით მოხდეს კვალიფიციური კადრების მომზადება.