საქართველოს ცენტრალური საარჩევნი კომისია (ცესკო) პარლამენტს საკანონმდებლო ინიციატივით მიმართავს. მათი სურვილია კანონმდებლობაში შევიდეს ცვლილებები და კომისიის წევრებს პენსიასთან ერთად დაენიშნოთ დანამატიც, რაც მოქმედი კომისიის წევრის ხელფასის 1/3 იქნება.

ცვლილების მიხედვით, კომპენსაცია კომისიის წევრს ენიშნება 65 წლის ასაკის მიღწევისას ან არანაკლებ 25 წლიანი შრომის საერთო სტაჟის შემთხვევაში, თუ პირი არანაკლებ 6 თვის განმავლობაში იყო ცენტრალური საარჩევნო კომისიის წევრი. მინიმუმ 8 წლიანი ცესკოში მუშაობის  სტაჟი მოეთხოვებათ კომისიის აპარატის მოხელეებს.

2016 წელს არასამთავრობო ორგანიზაცია „სამართლიანი არჩევნებისა და დემოკრატიის საერთაშორისო საზოგადოებამ (ISFED)” გამოაქვეყნა კვლევა ცესკოს თანამშრომელთა ხელფასების, დანამატებისა და პრემიების რაოდენობის შესახებ. კვლევის მიხედვით:

ცესკოს თავმჯდომარის ხელფასი - თვეში 5500 ლარი, თანხის 1/3 1833 ლარი

თავმჯდომარის მოადგილე - თვეში 4700 ლარი, თანხის 1/3 1566 ლარი

კომისიის მდივანი - თვეში 4600 ლარი, თანხის 1/3 1533 ლარი

კომისიის წევრი - თვეში 3900 ლარი, თანხის 1/3 1300 ლარი

დეპარტამენტის უფროსი - თვეში 3000 ლარი, თანხის 1/3 1000 ლარი

განყოფილების უფროსი - თვეში 2300 ლარი, თანხის 1/3 766 ლარი

მესამე კატეგორიის სპეციალისტი - თვეში 1700 ლარი, თანხის 1/3 566 ლარი

მეორე კატეგორიის სპეციალისტი - თვეში 1450 ლარი, თანხის 1/3 483 ლარი

პირველი კატეგორიის სპეციალისტი - თვეში 1150 ლარი, თანხის 1/3 383 ლარი.