ივანკა ტრამპი კატეგორიულად უარყოფს გავრცელებულ ინფორმაციას იმის შესახებ, რომ სირიის ავიაბაზის დაბომბვაში რაიმე ფორმით მონაწილეობდა. როგორც ტრამპის ქალიშვილი ირწმუნება, მამას საკუთარი პოზიცია გაუზიარა, თუმცა იდლიბის ტრაგიკულ მოვლენებთან დაკავშირებით პრეზიდენტსაც იგივე პოზიცია ჰქონდა.

 საბოლოოდ კი პრეზიდენტმა გადაწყვეტილება მრჩეველებთან კონსულტაციით მიიღო. იდლიბში ქიმიური იარაღის გამოყენების პასუხად ამერიკელებმა სირიის სამხედრო აეროდრომი დაბომბეს, რის შემდეგაც გავრცელდა ინფორმაცია, რომ მამის გადაწყვეტილებაში აქტიური როლი ივანკა ტრამპმა ითამაშა. 

პრეზიდენტის ქალიშვილმა კიდევ ერთხელ განაცხადა, რომ ამაყობს მამის გადაწყვეტილებით და იმით, თუ როგორ მკაფიოდ განმარტა მან, რომ ”აშშ არ შეურიგდება ქიმიური იარაღის გამოყენებით ამაზრზენ თავდასხმებს”.  

ტრამპის ქალიშვილი პრეზიდენტის სპეციალური მრჩევლის თანამდებობას იკავებს და თეთრ სახლში უხელფასოდ მუშაობს. მისი ქმარი ჯარედ კუშნერი აშშ-ის პრეზიდენტის უფროსი მრჩეველია.