დაზვერვის ფედერალური ბიუროს თანამშრომელი, რომელსაც ”ისლამური სახელმწიფოს” მებრძოლთან დაკავშირებულ გამოძიებაში მონაწილეობა დაავალეს, სირიაში ჩავიდა და ცოლად ტერორისტს გაყვა. ამის შესახებ CNN-ი იუწყება.

თარჯიმანი დანიელა გრინი დენის კასპერტს ცოლად 2014 წელს გაყვა, თუმცა პრესამ ამის შესახებ მხოლოდ დღეს გაიგო.

ტელეარხის ცნობით, რამდენიმე კვირის შემდეგ გრინმა აღიარა, რომ შეცდომა დაუშვა და აშშ-ში დაბრუნდა, სადაც ის დააპატიმრეს. გრინი ხელისუფლებას თანამშრომლობაზე დათანხმდა. მას ორწლიანი პატიმრობა მიუსაჯეს. გასული წლის ზაფხულში კი მან საპატიმრო უკვე დატოვა.

2015 წლის ოქტომბერში CNN-ი იტყობინებოდა, რომ 39 წლის კასპერტი სირიაში ამერიკის ავიაციიის იერიშისას დაიღუპა.  მანამდე ამერიკის სახელმწიფო დეპარტამენტმა ის საშიშ ტერორისტთა სიაში შეიყვანა. უწყების ცნობით, ყოფილი რეპერერი გერმანიიდან ”ისლამურ სახელმწიფოს” 2012 წელს შეუერთდა და დაჯგუფების პროპაგანდითა და მოქალაქეების გადაბირებით იყო დაკავებული. ის რამდენჯერმე ფიგურირებდა ”ისლამური სახელმწიფოს” ვიდეორგოლებში. ერთ-ერთ კადრში კი მას ადამიანის მოჭრილი თავი ხელში ეჭირა.