საფრანგეთის საპრეზიდენტო არჩევნების მეორე ტურის წინ გამართული ტელედებატებში, ფრანგული ტელეკომპანია BFMTV-ს გამოკითხვებით, ემანუელ მაკრონმა გაიმარჯვა. მას ხმა ტელემაყურებელთა 63%-მა მისცა, მარინ ლე პენს კი მხარი მხოლოდ 34%-მა დაუჭირა. 

მარინ ლე პენმა ცენტრისტ ემანუელ მაკრონს ელიტის წარმომადგენელი და ველური გლობალიზაციის კანდიდატი უწოდა, რომელიც რეფორმების გატარებას არ გეგმავს. 

თავის მხრივ, ემანუელ მაკრონმა ლე პენის ეკონომიკური პროგრამა გააკრიტიკა და ევროს ვალუტის გაუქმებასთან დაკავშირებით, ურთიერთგამომრიცხავ ფაქტორებზე გაამახვილა ყურადღება. გარდა ამისა, ულტრამემარჯვენეების ლიდერი “სიცრუის სტრატეგიის” გამოყენებასა და მუდმივად შიშის ქადაგებაში დაადანაშაულა, და საკუთარი მამის, ჟან-მარი ლე პენის, ნამდვილი მემკვიდრე უწოდა, რომელიც ანტისემიტური და ქსენოფობიური შეხედულებებით არის ცნობილი. 

 ემანუელ მაკრონი გამარჯვების შემთხვევაში, უძრავ ქონებაზე გადასახადის გაუქმებას, ბიზნესს კი მათ შემცირებას ჰპირდება, რაზეც მარინ ლე პენმა განაცხადა, რომ მაკრონის გეგმები მრავალ ოჯახს გააღატაკებს. თავად კი მცირეწლოვნებისთვის უნივერსალური დახმარების პროგრამის აღდგენის იდეით გამოდის და მიაჩნია, რომ არსებული პროგრამა საფრთხის წინაშეა, სოფელს კი დაცლა ემუქრება.

მარინ ლე პენი ამომრჩევლებს უმუშევრობის დონის შემცირებას ჰპირდება, რომელიც მისი თქმით, ღია კარის პოლიტიკითა და გლობალიზაციით არის გამოწვეული. 60 წელს მიღწეულ მოქალაქეებს კი პენსიაზე გასვლის შესაძლებლობას სთავაზობს. 

გამოკითხვაში მონაწილეობა მიიღო 1314 ადამიანმა.